2019 жылғы 21 мамырда Атырау қаласында облыстың білім беру ұйымдарының еңбекті қорғау жөніндегі техникалық инспекторлары үшін еңбек қауіпсіздігі мен еңбекті қорғау бойынша семинар-кеңес өткізіліп, оны Атырау облыстық ұйымының төрағасы Қылышбай Сүндетұлы ашты.  

Семинар-кеңеске Қазақстандық салалық білім жне ғылым қызметкерлері кәсіподағының бас маманы-техникалық еңбек инспекторы Алиев Батыр шақырылып, ол Кәсіподақтың техникалық инспекциясының қызметі, еңбек қауіпсіздігі және еңбекті қорғау мәселелеріне, соның ішінде:  еңбек қауіпсіздігі және еңбекті қорғау жөніндегі Өндірістік кеңесті құруға; еңбек қауіпсіздігі және еңбекті қорғау бойынша қоғамдық ішкі бақылауды ұйымдастыру жөніндегі техникалық инспекторлардың құқықтары мен өкілеттіктеріне қатысты Қазақстан Республикасының қолданыстағы заңнама талаптары туралы ақпарат берді. Семинарға қатысушыларға техникалық инспекторлардың күнделікті жұмысын ойдағыдай құруға септігін тигізетін қадамдық алгоритм ұсынылды.

Сонымен қатар, еңбек қауіпсіздігі және еңбекті қорғау бойынша ішкі бақылауды жүзеге асыру кезінде, ұжымдық шарттарды, келісімдерді орындауда техникалық инспекторлармен анықталған заңнама талаптарының неғұрлым кең таралған бұзушылықтары талқыланды.

Семинар-кеңес қатысушылары сондай-ақ еңбек және халықты әлеуметтік қорғау Министрлігімен бекітілген 2019 жылы «Еңбек қауіпсіздігі және еңбекті қорғау Жылын» өткізу жөніндегі Жол картасын талқылады.

Семинар соңында пікірталас сағаты өткізіліп, онда қатысушылар өз пікірлерімен және ақпараттарымен алмасты, сондай-ақ қойылған сұрақтарға жауап алды.

2019 жылғы 17 мамырда Батыс Қазақстан облыстық білім және ғылым қызметкерлері кәсіподағының ұйымдастыруымен Жастар жылы аясында «Бүгінгі кәсіподаққа – белсенді жастар!» тақырыбында облыстық жастар форумы өз жұмысын бастады.

Шараға Қазақстандық салалық білім және ғылым қызметкерлері кәсіподағының Жастар ісі бойынша Кеңестің төрайымы Әлия Әбиева және БҚО Кәсіподақтар орталығының өкілі  Айгүл Есекенова қатысты.

Форумды Батыс Қазақстан облыстық ұйымының төрағасы Марат Даупаев ашты. Өз сөзінде Елдің келешегі Тәуелсіздік тұтқасын әрі қарай ұстайтын, ауқымды стратегияларды іске асыруда жастардың ықпалы зор екенін атап өтіп, ұстаздардың жас ұрпақты тәрбиелеу мен білім берудегі еңбектері жоғары бағаланып, әлі де жарқын күндер алдымыздан күтіледі деп жастарға үлкен үміт артатынына айтты.

Әлия Әбиева, салалық кәсіподақтағы еңбекші жастардың белсенділігі және олардың алға қойған мақсат-міндеттері туралы ақпаратпен бөлісті.  

"Жас Отан" Жастар Қанаты БҚО филиалының төрағасы Нұрғали Жолдасқалиев облыс бойынша жастарды әлеуметтік қолдау бағдарламалары туралы өз ойын ортаға салды.

Форум барысында кәсіподақтың белсенді жастары БҚО білім және ғылым қызметкерлері кәсіподағының құрмет грамоталарымен марапатталып, бағалы сыйлықтар табысталды.

Бағдарламаға сәйкес, форум семинар-тренингпен жалғасады. Семинар-тренингті «Өрлеу» біліктілік арттыру Ұлттық Орталығының филиалы БҚО біліктілік арттыру институтының бас тренері Сәнім Абитова және тренер Жансая Ұзақова жүргізеді.