+7 (7172) 21 04 54 
proin.kz@mail.ru 
Новости территориальных организаций
КӘСІПОДАҚ БЕЛСЕНДІЛЕРІНІҢ ҰЛЫЛАР ЕЛІНЕ САЯХАТЫ
23 мая 2022
Заманымыздың заңғар жазушысы Мұхтар Әуезовтің туғанына 125 жыл толуына орай ұлылар мекені Жидебайға саяхат ұйымдастырылды. Саяхат - сапардың негізгі ұйымдастырушысы-Қазақстандық салалық білім және ғылым қызметкерлері кәсіптік одағының Семей аймақтық ұйымы қоғамдық бірлестігі. Сапарлаушылар Семей аймақтық кәсіподақ ұйымдарының белсенділері.
Алғашқы аялдаған жеріміз – Күшікбай асуы болды. Жалпы Күшікбай асуы жолаушылардың ат шалдырып, демалатын орны. Ұлылар мекеніне сапарлаушы кәсіподақ белсенділері осы жерде қасиетті бұлақтан су ішіп, шөл қандырды. Келесі аялдамамыз Бөрілідегі Мұхтар Әуезовтің мұражай-үйі болды. Бөрілідегі Мұхтар Әуезовтің мемлекеттік мемориалдық әдеби-тарихи музейін аралап, Абайды әлемге танытқан заңғар жазушыны да назардан тыс қалдырмады. Мұхтар Әуезов жайлы көптеген құнды деректерге қанығып жер атауының неліктен Бөрілі атанғаны жайлы қызықты ақпараттармен таныстық. Бөрілі – түз тағысы қасқырдың көп болуы себепті берілген атау екен.
Жолай қос ғашық Еңлік –Кебек ескерткішіне тоқтап естелік суретке түстік. Сапардың тағы бір қызықты бағыты Абайдың Жидебайдағы мұражай-үйі болды.
Мұражай табалдырығын аттаған сапарлаушылар қазақтың бас ақынының ата-тегі, ұрпақтары жайынан сыр шертетін шежірені қызыға тыңдап, әр бөлмедегі күні бүгінге дейін сақталған жәдігерлермен жеке-жеке танысты.
Сол арқылы көшпелі қазақ қауымына, кешегі Абай заманына сапар шеккендей күй кешті. Абай інісі Оспанмен, Шәкәрім ұлы Ахатпен бірге мәңгілік жер бесігінде тербелуде. Ұлы бабалардың рухына тағзым етіліп, құран бағышталды. Абай мен Шәкәрім кесенесін аралап, алыптар рухына тағзым еткен сапар амфитеатрда өз жалғасын тапты. Бұл жерде ақын шығармашылығын дәріптеушілер Шәкәрім университетінің музыкалық білім беру кафедрасының аға оқытушысы, халықаралық конкурстардың лауреаты Тыныбаева Жания Тоқанқызы Абай операсынан Ажардың ариясын, музыкалық колледждің бастауыш кәсіподақ ұйымының төрағасы Жолымбетов Ринат Бияшұлы Абайдың «Желсіз түнде жарық ай», «Көзімнің қарасы» әндерін тамылжыта орындап өз өнерлерімен саяхаттаушыларды тәнті етті. Бұл кішігірім концерттен саяхаттаушылар үлкен әсер алып, тебіреніспен шықты.
Қазақ даласының қай жері болмасын тарихқа бай, шежіреге толы. Осы сапар барысында үлкен әсерге бөлеген, тылсымға толы тағы бір кереметтің бірі – «Қоңыр әулие» үңгірі болды. Арнасы белгісіз, жанға шипа суы бар, қысы-жазы бір қалыпта тұратын «Қоңыр әулие» үңгірі туралы айтылған аңыз-әңгімелерді тыңдай жүріп,шипалы суына шомылып, тілек тіледік.
Ұлылар еліне сапар шеккен кәсіподақ белсенділері қазақ руханиятының алтын бесігі болған «Семей-Жидебай» қазыналы өлкесінен үлкен әсермен оралды.
Бізді Абай әлемімен тағы бір мәрте жақындастырып, оның өмір сүрген заманындағы тарихи оқиғалармен, дәуір келбетімен таныстыруға, осы саяхаттың бастамашысы болған, қаржылай қолдау көрсеткен Қазақстандық салалық білім және ғылым қызметкерлерінің кәсіптік одағының Семей аймақтық ұйымы қоғамдық бірлестігінің төрағасы Ибраев Сәбит Молдатияұлына, бірлестіктің ұйымдастыру жұмыстары бойынша маманы Воказе Ұлжан Ернарқызына айтар алғысымыз шексіз!
Қ. Құрманбаева,
Семей қаласының Шәкәрім атындағы университетінің
бастауыш кәсіподақ ұйымының төрайымы.
