АРДАГЕР ҰСТАЗҒА ҚҰРМЕТ

Қарттар күні және Мұғалімдер мерекесі қарсаңында Ғабит Мүсірепов атындағы аудандағы Тоқсан би орта мектебінің оқушылары мен педагогтары кәсіподақ комитетінің ұсынысымен педагогикалық еңбек ардагері, саналы ғұмырын ұрпақ тәрбиесі мен білім беруге арнаған бастауыш сынып мұғалімі В.Кроттың үйіне арнайы барып, ізгі ниеттерін білдірді.

Валентина Юрьевна ұзақ жылдар бойы балалармен жұмыс істеп, талай шәкірттің сауатын ашып, білім мен тәрбие берген тәжірибелі ұстаз. Оның ұстаздық жолы жас ұрпаққа үлгі, педагогикалық еңбегі әріптестері мен шәкірттерінің құрметіне ие.

Кездесу барысында мектеп оқушылары мен педагогтар ардагер ұстазға жылы лебіздерін жеткізіп, зор денсаулық, ұзақ ғұмыр, отбасына амандық және көтеріңкі көңіл күй тіледі. Ұстаз еңбегінің қоғамдағы маңызы, шәкірт тәрбиесіне қосқан үлесі туралы айтылып, мектеп ұжымы атынан алғыс білдірілді.

Валентина Юрьевна өз кезегінде қонақтарды жылы қарсы алып, мектеп оқушылары мен ізбасар әріптестеріне ризашылығын білдірді. Кездесу барысында ұстаздық қызметтегі естеліктерімен бөлісіп, жас ұрпаққа ақыл-кеңестерін айтты. Мұндай кездесулер оқушыларға үлкенді сыйлау, еңбек адамын құрметтеу және ізгілік таныту құндылықтарын ұғынуға мүмкіндік береді.

Сонымен қатар балалар мен педагогтар ардагер ұстаздың үйі маңындағы аумақты жинастыруға қолғабыс көрсетті. Олар аула тазалығына көңіл бөліп, жапырақтарды жинап, айналаны ретке келтірді. Бұл игі іс оқушылардың еңбекке деген жауапкершілігін арттырып қана қоймай, үлкендерге көмек көрсету мен қамқорлық танытудың маңызын көрсетті.

Іс-шара барысында ерекше жылы әрі әсерлі атмосфера қалыптасты. Оқушылар үшін бұл кездесу — ардагер ұстаздың өмір жолымен танысып, оның еңбегін бағалауға мүмкіндік берген тағылымды сабақ болды. Ал мектеп педагогтары үшін әріптестері мен ұстаздық жолдың аға буын өкілдеріне құрмет көрсету — үлкен адамгершілік парыз.

Осындай игі шаралар аға буынға деген құрметті арттырып, ұрпақтар сабақтастығын нығайтады. Ардагер ұстаздарға көрсетілген құрмет — олардың еңбегіне берілген жоғары баға және кейінгі ұрпаққа үлгі боларлық ізгі дәстүрдің жалғасы.

Солтүстік Қазақстан облыстық ұйымы