КӘСІПОДАҚ ЕҢБЕК ҰЖЫМЫМЕН БІРГЕ
Орал қалалық №5 ЖОББМ қызметкерлерінің бастауыш кәсіподақ ұйымы еңбек ұжымы үшін «Светлячок» демалыс базасында «Табиғат аясында серуен» шарасын ұйымдастырды. Басты мақсат – ұжымның бірлігін нығайту, жұмыстағы күйзелістің алдын алу, қызметкерлермен бейресми, ашық диалог алаңын қалыптастыру.
№5 ЖОББМ бастауыш кәсіподақ ұйымының төрайымы – кітапхана меңгерушісі, 14 жыл еңбек өтілі бар Гүлсара Сәрсенғалиқызы өз сөзінде: «Еңбек ұжымындағы бейресми, ашық диалогтардың қалыптасуы – еңбек қатынастарындағы мәселелерге жол бермейді», - дейді.
Бұл орайда Кәсіподақ жұмыстары бірлестіктегі ардагер мамандар мен жас мамандардың тәжірибе алмасу, қызметкерлердің денсаулықтарын жақсарту, мамандардың құқықтық сауатты болу, тиімді, пайдалы демалыс күндерін өткізу шараларына бағытталады.
- Биылғы оқу жылы біздің ұжым үшін жетістікке толы жыл болды. Бірақ, әр жетістік артында мыңдаған еңбектің жатқаны жасырын емес. Сондықтан да кәсіподақ мүшелерін алып, табиғат аясында демалыс күндерін өткізуді жөн көрдік. Маман сапасын жақсартуға, белсенділігін арттыруға бағытталған кәсіподақ ұстанымына әрдайым өзінің қолдауын білдіріп отыратын мектеп басшысы – Бақытжанова Әсем Самиғоллақызына алғысымды білдіремін, - дейді кәсіподақ жетекшісі.
Фотографии