АРДАГЕРЛЕРМЕН КЕЗДЕСУ
Еліміздің білім жүйесінің дамуына зор үлес қосып, өзінің біліктілігімен, кәсібилігімен дараланған ардагер ұстаздар көп... Елінің болашағы мен халқының кемел келешегі үшін талмай қызмет етіп, саналы ғұмырын осы жолға арнаған бірегей тұлғалардың жүрген жолында елеулі із қалары анық. Осы орайда Ақтөбе жоғары политехникалық колледжінің ұжымы ардагерлермен кездесті. Тағылымды кеште орамды ой, келісті пікірлер айтылды. Олардың барлығы өңірдің білім беру саласын дамытуға елеулі үлес қосқан ұлағатты ұстаздар…
Басқосуда Ақтөбе жоғары политехникалық колледжінің директоры Жеңісгүл Мұхамбетпаизова ардагер ұстаздарға зор ризашылығы мен алғысын айтып, еселі еңбектің зейнетін көріп, әркез қуаныш пен шаттыққа бөленуіне тілектестігін білдірді.
Бұл іс-шараның өтуі – ұрпақтар сабақтастығын жалғастырып, ардагерлердің өмірлік тәжірибесін үйрену сондай-ақ, кейінгі ұрпаққа үлгі етуге бағытталған.
Кездесуде ұстаздық ұлы қызметті мінсіз атқарып, сан жылдар бойы білім саласында қызмет еткен ардагерлер толассыз қошемет пен мадақ-марапатқа бөленіп, оқу-ағарту министрінің алғыс хаттары табысталды.
Салтанатты рәсім сазды әуен, әуезді ән мен күй шеруіне жалғасты. Оқу орнының өнерпаз ұстаздары көрермен көңілін серпілтіп, қуаныш сыйлады.
Шара соңында ардагерлерге ақ дастарқан жайылып, құрмет көрсетілді. Жиналған ардагерлер ұйымдастырушыларға алғысын айтып, ақ батасын берді.
-
Фотографии
-
