БАСТЫ МІНДЕТ – САЛАУАТТЫ ӨМІР САЛТЫН НАСИХАТТАУ
2024 жылдың 23 ақпан күні БҚО Тасқала аудандық кәсіподақ комитеті- Филиалының ұйымдастыруымен Қазақстандық оқу-ағарту, ғылым және жоғарғы білім қызметкерлері салалық кәсіподағының 100 жылдығына орай кәсіподақ мүшелері арасындағы облыстық VІІІ ші «Денсаулық» спартакиадасының аудандық кезеңі өткізілді.
Шараға Батыс Қазақстан облыстық оқу-ағарту, ғылым және жоғары білім қызметкерлері кәсіподағының төрағасы Марат Даупаев, бас маман – ұйымдастырушы Марина Темірғалиева, аудандық кәсіподақ комитеті - Филиалының төрайымы Лайла Ғаббасова және мектеп директорлары мен ауданның білім бөліміне қарасты барлық командалар қатысты.
Шара барысында төраға Марат Даупаев кәсіподақ мүшелері арасында салауатты өмір салтын насихаттау, кәсіподақ жұмысын жетілдіру мен бірлігін нығайту біздің басты мақсатымыз екенін атап өтіп, спартакиадаға қатысушыларды құттықтады.
Жарыс қорытындысы бойынша «Жалпы командалық есепте» және волейбол ойнынан «Сәулет МЛ» бастауыш кәсіподақ ұйымының командасы І орын, Қ.Сәтбаев атындағы МГ бастауыш кәсіподақ ұйымының командасы ІІ орын, Мереке МББК бастауыш кәсіподақ ұйымының командасы жүлделі ІІІ орынды иеленді. Командаларға облыстық кәсіподақ ұйымының төрағасы Марат Даупаев сертификаттар табыстады.
Теннис ойыны бойынша жеңімпаздарды облыстық кәсіподақ ұйымының бас маманы Марина Темірғалиева бағалы сыйлықтармен марапаттады. Жарыста белсенділік танытқан барлық команадаларға ынталандыру сыйлықтары берілді.
Кеш барысында сайысқа қатысушылардың құрметіне арналған Маягүл Сариеваның «Қиялдан» би тобының «Жауқазын биі» орындалып, кішкентай әнші Самира «Даламай» әнін шырқады.
Аудандық спартакиаданы өткізуге қолдау білдірген облыстық кәсіподақ ұйымының төрағасы Марат Даупаевқа аудан педагогтары зор алғыстарын білдірді.
Тасқала ауданының білім қызметкерлері салауатты өмір салтын қолдайтын және педагог қызметтерімен қатар спортты да серік ете білген керемет ұжым екендігі шүбасыз.
-
Фотографии
-
