АРДАГЕР ҰСТАЗДАР МАРАПАТТАЛДЫ
Бүгін, 5 наурызда Атырау облысы, Махамбет ауданы, Қ.Қалыбеков атындағы Сарытоғай орта мектебінде тарих ғылымдарының докторы, профессор, Сарытоғай орта мектебінің 1981 жылғы түлегі Әбілсейіт Мұқтардың «Сарытоғай ауылы тарихы» атты монографиясының таныстырылымы өтті. Шара модераторы: «Атырау облысы білім және ғылым қызметкерлерінің кәсіптік одағы» қоғамдық бірлестігінің төрағасы, тарих ғылымдарының кандидаты Қылышбай Сүндетұлы болды.
Монография таныстырылымына ауыл ақсақалдары, ардагер ұстаздар, мектеп басшылығы, мұғалімдер, оқушылар, музей-қорық қызметкерлері мен шәкірттері қатысты. ЖиындыСарытоғай орта мектебінің директоры Райса Альдешова құттықтау сөз сөйлеп ашты. Ғылыми еңбек авторының өмір жолы туралы тарих ғылымдарының кандидаты Қылышбай Сүндетұлы баяндаған болса, магистр Амангелді Жұмабаев «Сарытоғай ауылы тарихы» монографиясының мазмұны туралы мәліметтер берді.
Х. Досмұхамедов атындағы Атырау университетінің профессоры,тарих ғылымдарының докторы Ұлжан Ахметова, ардагер журналист, ауыл ақсақалы Бағыт Көшербаев, ардагер ұстаз Қаламқас Құмарова, 1987 – 2004 жылдардағы Сарытоғай орта мектебінің директоры Серік Қапашев, ауыл ардагері Қаржаубай Дүйсенов ғылыми еңбек туралы өз пікірлерін білдірді.
Сөз соңында монография авторы тарих ғылымдарының докторы,профессор Әбілсейіт Мұқтар жиналғандарға алғыс білдіріп, еңбек туралы қосымша деректер келтіріп, өткен күндерді еске алды.
Кітаптың тұсаукесу рәсімін кітап авторының анасы Сәуле Боранғалиқызы мен алғашқы ұстазы Қаламқас Құмарова жасады.
Жиын соңында «Атырау облысы білім және ғылым қызметкерлерінің кәсіптік одағы» қоғамдық бірлестігінің төрағасы Қылышбай Сүндетұлы ардагер ұстаз Қаламқас Құмароваға ҚР Оқу-ағарту министрлігінің «Еңбек ардагері», ал Серік Қапашевқа Атырау облысы ардагерлер кеңесінің «Тәлімгер» медальдарын табыс етті.
«Атырау облысы білім және ғылым қызметкерлерінің кәсіптік одағы» ҚБ баспасөз қызметі
-
Фотографии
-
