ЫРҒЫЗ АУДАНЫНЫҢ КӘСІПОДАҚ БАРЫСЫ АНЫҚТАЛДЫ
Ақтөбенің Ырғыз ауданында Қазақстандық оқу-ағарту, ғылым және жоғары білім қызметкерлері салалық кәсіподағының 100 жылдығына орай қазақ күресінен “Кәсіподақ барысы” республикалық турнирінің аудандық кезеңі өтті. Турнирді Ырғыз аудандық білім қызметкерлері кәсіподақ ұйымы ұйымдастырды.
Туринирдің басты мақсаты —Қазақстан Республикасында ұлттық спорт түрлерін дамыту арқылы салауатты өмір салтын қалыптастыру қағидаттарын насихаттау, ұлттық құндылықтарды дәріптеу мен дамыту басымдықтарын жүзеге асыру; Сала қызметкерлерін қазақ күресімен шұғылдануға тарту арқылы олардың бойында отансүйгіштік сезімді қалыптастыру мен жетілдіру; өңірде салалық деңгейде қазақ күресінің дәрежесін көтеру; кәсіподақ ұйымдары арасында шынайы бәсекелестікті дамыту мен кәсіподақ мүшелігімен қамтуға ынталандыру; кәсіподақ органдарын ұлттық спорт түрлерін дамыту ісінде тәжірибе алмастыру.
Республикалық турнир ересектер арасында 90 кг-ға дейін және 90 кг-нан жоғары салмақ дәрежесінде өтті.
Сайысқа 38 білім беру ұйымдарынан 60-қа жуық балуандар қатысып, бақ сынасты.
Сайысты кіріспе сөзімен ашқан аудандық білім қызметкерлері кәсіподақ ұйымының төрағасы Қасымхан Әбенов кәсіподақ саласында атқарылып жатқан жұмыстарға тоқталып, турнир қатысушыларына сәттілік тіледі. Одан соң аудандық білім бөлімінің басшысы Дархан Ысқақов пен кәсіподақ ардагерлері жарысқа қатысушыларға ақжарма тілектерін жеткізді.
Жарыс нәтижесінде 70-90кг дәрежесінде №1 қазақ жалпы білім беретін орта мектебінің мұғалімі Нұрлан Тарланұлы жеңімпаз атанса, 90 кг жоғары салмақ дәрежесінде Т.Шонанұлы атындағы жалпы білім беретін орта мектебінің мұғалімі Еділ Сағынаев жеңіске жетіп, облыстық турнирге жолдама мен кәсіподақ ұйымының шипажай жолдамасын жеңіп алды.
Туринирге қатысушылар номинациялармен марапатталып, кәсіподақ ұйымының қаржылай сыйлықтарына ие болды.
-
Фотографии
-
