МҰҒАЛІМДЕР КҮНІНЕ АРНАЛҒАН СЕМИНАР-КЕҢЕС
Былтыр қабылданған Үкімет қаулысына сәйкес 5 қазан - мұғалімдер күні ретінде белгіленген. Ұстаздар қауымының қоғам дамуындағы рөлі мен еңбегі, оған қосатын зор үлесі аталып өтілетін мереке қарсаңында Жамбыл облысы оқу-ағарту, ғылым және жоғары білім қызметкерлерінің жергілікті кәсіподағының оқу-әдістемелік орталығы «Еңбек және салалық заңнаманы, әлеуметтік әріптестік актілерін тәжірибеде қолданудың бірқатар сұрақтары» тақырыбында семинар ұйымдастырды.
«Жамбыл дарыны» облыстық орталығының мәжіліс залында өткен іс-шараға Жергілікті кәсіподақтың Біріккен комитеті филиалына қарасты білім мекемелері мен ұйымдарының басшылары, бастауыш ұйым төрағалары қатысты. Жергілікті кәсіподақ төрағасы Ерұлан Мағзымбеков алдымен барлық қатысушыларды кәсіби мерекелерімен құттықтап, жұмыстарына сәттілік тіледі.
- Ұстаз болашақ азаматтарды ғана емес, бүкіл қоғамды қалыптастырады. Ұстаздарға қарап бүкіл қоғам бой түзейді. Сондықтан да, мұғалімдердің әлеуметтік хал-ахуалы, еңбек жағдайлары, құқықтарының қорғалуы маңызды саналады. Бұл мәселелер Президенттің биылғы Жолдауында да назардан тыс қалмады. Біз өз тарапымыздан әлеуметтік әріптестік аясында сала қызметкерлерінің мәртебесін көтеруге бар күшімізді салудамыз. Соның бір көрінісі – облыстық білім басқармасы мен жергілікті кәсіподақ арасындағы 2024-2026 жылдарға жасалған әлеуметтік әріптестік туралы Келісім мен Ұжымдық шарт, - деді Ерұлан Сәбенұлы.
Мұнан соң Келісімнің мазмұнымен, артықшылықтарымен Жергілікті кәсіподақтың бас құқықтық инспекторы Әлия Джолшибекова таныстырып өтсе, сала қызметкерлерінің әлеуметтік-еңбек құқықтары мен мүдделеріне қатысты сан сауалға Жергілікті кәсіподақ ұйымы төрағасының орынбасары Жанболат Орынбеков жауап берді.
Іс-шара соңында бірқатар сала қызметкерлері «Үздік әлеуметтік әріптес», «Білім және ғылым қызметкерлері кәсіподағына сіңірген еңбегі үшін», «Кәсіподақ ардагері» белгілерімен марапатталса, бірқатар ұстаздар білім жүйесіндегі көпжылғы адал еңбегі, өскелең ұрпаққа өнегелі тәрбие мен сапалы білім берудегі шығармашылық жетістіктері үшін ҚР Оқу ағарту, ғылым және жоғары білім қызметкерлерінің салалық кәсіподағының, облыстық кәсіподақтар орталығы мен білім басқармасымен бірлескен жергілікті кәсіподақтың Құрмет грамоталары және Алғыс хаттарымен марапатталды.
Жамбыл облысы оқу-ағарту, ғылым және жоғары білім қызметкерлерінің жергілікті кәсіподағы.
-
Фотографии
-
