Новости территориальных организаций

Қызылорда қаласының сол жағалауында бой көтерген жаңа «Оқушылар үйінде» Қазақстандық оқу-ағарту, ғылым және жоғары білім қызметкерлері салалық кәсіподағының Қызылорда облыстық ұйымының үздіктерін анықтауға бағытталған «Үздік кәсіподақ көшбасшы - 2024» байқауы болып өтті. Әр жылды қорытындылаудың маңызды іс-шараларының бірі саналатын аталмыш байқау дәстүрлі түрде ұйымдастырылып келеді.

Қала және аудандардағы іріктеуден өтіп, облыстық кезеңге жолдама алған қатысушы, аймақтың білім беру мекемелеріндегі бастауыш ұйымдардың төрағалары өзін-өзі таныстыру, қолданыстағы заңнамалар мен ситуациялық сұрақтарға жауап беру, өз өнерін көрсету секілді сынақтардан өткізілді.

Байқауға кәсіподақ саласының тәжірибелі мамандары мен бұқаралық ақпарат құралдарының өкілдері қазылық етті.

Байқау нәтижесімен үздік бастауыш ұйымдарының көшбасшылары анықталып, арнайы алғыс хаттармен және бағалы сыйлықтармен марапатталды.

Нақтырақ айтсақ, Қызылорда қаласындағы Т.Есетов атындағы №264 мектеп-лицейінің бастауыш кәсіподақ ұйымының төрағасы, математика пәнінің мұғалімі Балмаханова Айнур Ергалиевна 1-орынды, Жаңақорған аграрлы-техникалық колледжінің бастауыш кәсіподақ ұйымының төрағасы Мампаев Алмат Құбанайұлы 2-орынды, Арал ауданындағы №260 орта мектебінің бастауыш кәсіподақ ұйымының төрағасы, орыс тілі мен әдебиеті пәнінің мұғалімі Кульниязова Кульмараш Жумабаевна 3-орынды иеленді.

Шара барысында Кәсіподақ қозғалысының 100 жылдығына орай Облыстық кәсіподақ комитетінің 23-29 қыркуйек аралығында облыстық апталық барысында өткізілген «Бірлік бейнесі» атты бейнеролик байқауының жеңімпаздары да марапатталды. Бұл сында үздік нәтиже көрсеткен Арал, Шиелі, Қармақшы және Жалағаш аудандарының ұстаздарының белсенділігін айта кету керек.

Сонымен қатар, жүлделі III орынды Қызылорда қаласы "Сыр дидары" бөбекжай-бақшасы, II орынды Арал ауданы №283 орта мектебі, I орынды Қызылорда қаласы С.Толыбеков атындағы №3 ақпараттық технология мектеп-лицейі иеленді.

Бұған қоса, «Үздік әдістемелік кабинет» байқауының жеңімпаздары да марапат төрінен көрініп, ерекше құрметке бөленді.

Дәстүрлі іс-шара Қазанғап атындағы Қызылорда музыкалық колледжінің студенттері ұсынған концерттік бағдарламаға ұласты.

Облыстық Білім кәсіподағының төрағасы Гүлнар Бабабекқызы барлық жеңімпаздарды құттықтап, іс-шараның жоғары деңгейде өтуіне атсалысқан әріптестерге алғысын білдірді.