ДӘСТҮРЛІ «ДЕНСАУЛЫҚ» СПАРТАКИАДАСЫ
Ағымдағы жылдың 13-16 қаңтар аралығында М.Өтемісов атындағы Батыс Қазақстан университетінде бастауыш кәсіподақ ұйымының қолдауымен профессор-оқытушылар құрамы мен қызметкерлер арасындағы дәстүрлі 67-ші «Денсаулық» спартакиадасы өткізілді. Аталған сайыстың негізгі мақсаты – профессор–оқытушылар құрамы мен қызметкерлер арасында салауатты өмір салтын насихаттау, қалалық және облыстық деңгейдегі өткізілетін спорттық додаларға университет құрама командасын жасақтау.
60 жылдан астам уақыт бойы дәстүрлі түрде жыл сайын өткізіліп келе жатқан спорттық сайыста университеттің профессор-оқытушылар құрамы мен қызметкерлері күш сынасып, өзара мықтыларды анықтады.
Биылғы жылы спартакиадаға университет факультеттері мен құрылымдық бөлімшелерінен құралған 9 команда қатысып, спорттың волейбол, шағын футбол, шахмат, дойбы, үстел теннисі, дартс, арқан тартыс, шаңғы эстафетасы сияқты 8 түрінен сайысқа түсті.
Тартысқа толы дүбірлі додада жалпы командалық есепте жүлделі І орынды шаруашылық қызметінің құрама командасы, ІІ орынды университет әкімшілігінің құрама командасы, ІІІ орынды мәдениет және өнер факультетінің құрама командасы иеленді.
Жарыс соңында профессор-оқытушылар құрамы мен қызметкерлер үшін табиғат аясында шаңғы серуені ұйымдастырылды.
Жеңімпаз командалар дипломдармен марапатталып, университеттің бастауыш кәсіподақ ұйымы атынан бағалы сыйлықтар табысталды. Спорттың әр түрі бойынша үздік ойыншылар да анықталып, марапатталды.
БҚО кәсіподақ ұйымы
-
Фотографии
-
