ҰСТАЗ – БІЛІМ ШЫРАҒЫ
Ұстаз болу – жүректің таңдауы. Бұл мамандық тек білім берумен шектелмейді, жас ұрпақтың санасына сәуле шашып, болашағын қалыптастыру - ұлы іс. Осы мәртебелі міндетті адал атқарып жүрген жандардың бірі - Таңшолпан Күшікбаева. Маңғыстау облысы, Бейнеу ауданында дүниеге келген оның балалық қызығушылық арманы, уақыт өте келе оны педагогика жолына жетеледі.
Еңбек жолын 2000-шы жылы Опорный орта мектебінің биология пәні мұғалімі болып бастады. 2007 жылдан бері Маңғыстау облысы білім басқармасының Жаңаөзен ҚББ-нің №24 мектеп-лицейінде еңбек етіп жүрген тәжірибелі ұстаз.
Ұстаз еңбегі тек өзі жеткен жетістіктерімен емес, шәкірттерінің биік белестерді бағындыруымен де өлшенеді. Таңшолпанның дарынды шәкірттері биология пәні бойынша түрлі деңгейдегі байқауларда топ жарып, өз ұстаздарының есімін асқақтатып келеді.
Шәкірттері облыс, республика деңгейінде биология пәні бойынша пәндік олимпиадалардың және ғылыми жоба байқауларының жеңімпаздары.
Шәкірттерге терең білім мен саналы тәрбие берумен бірге, білім беру жүйесін дамытуға қосқан үлесі үшін ҚР Білім және Ғылым министрінің, қала әкімінің, Маңғыстау облысы білім басқармасының Алғыс хаттарымен, Жаңаөзен қалалық білім бөлімінің Құрмет грамотасымен марапатталған.
Бүгінде Таңшолпанның ұстаздық жолы жалғасуда. Ұстаз үшін ең маңыздысы – оқушылардың тек жақсы білім алып қана қоймай, өмірде өз жолын таба білуі. Ол осы мақсатта шәкірттерін үнемі қолдап, жігерлендіріп отырады.
Таңшолпан Күшікбаеваның еңбектерін бағалап, шығармашылық табыстар тілейміз!
Маңғыстау облысы, Жаңаөзен қалалық кәсіподақ филиалы
