МАМАНДЫҚҚА АДАЛДЫҚ
Шығыс Қазақстан облысы Зайсан ауданы Қаратал ауылындағы Оспановтар мұғалімдер әулеті туралы осылай айтуға болады. Себебі мұғалімдер көп, бірақ мұғалімдер әулеті аз.
Шығыс Қазақстан облысында алты баласы да мұғалімдік мамандықты таңдаған 1985 жылға дейінгі бір отбасы – Оспановтар әулеті. Мұғалімдер отбасының отағасы Хабдилвахит (Қаукен) Оспанұлы 1932 жылы туған. 1950 жылы Семей қаласындағы мұғалімдер институтын (2 жылдық) бітіріп, 1950-1956 жылдары Үлкен Қаратал ауылында мұғалім, мектеп директоры, 1956-1996 жылдары 40 жыл Қаратал орта мектебінде математика, тарих пәндерінен сабақ берді.
Отбасында алты баласы, төрт келіні, үш немересі педагог мамандығының иесі.
Олардың арасында орыс тілі мен әдебиеті, тарих, биология химия, математика, физика, ағылшын тілі, неміс тілі, алғашқы әскери дайындық, дене шынықтыру мұғалімдері бар. Оспановтар мұғалімдер әулетінің жалпы еңбек өтілі 400 жылдан асады.
Осы әулеттің ортаншы ұлы Сабыржан 1961 жылы туған. Қарағанды педагогикалық институтының алғашқы әскери даярлық және дене шынықтыру факультетін бітіріп, Қаратал мектебінде мұғалім болған. 2015 жылы қайтыс болды. Жұбайы Ғалия Қайролдақызымен бірге үш бала тәрбиелеп өсірді. Тоқтасынова Ғалия химия-биология пәнінің мұғалімі. Балалары: Ержан - кәсіпкер, жұбайы - Жанбота мұғалім. Қызы Нұргүл ағылшын тілі мұғалімі, жұбайы Қуаныш – кәсіпкер. Кенже ұлы Серікжан - әскери қызметте, жұбайы Жауказын - информатика пәні мұғалімі.
Бүгінде өздерінің кіндік қаны тамған Қаратал ауылына келіп, әкелері Сабыржан Хабдилвахитұлын еске алып, құран бағыштап, волейболдан ерлер арасында турнир өткізді. Ашылу салтанатында аудандық білім беру қызметкерлерінің кәсіподақ төрағасы Қ. Е. Сайранов әулет жайлы жылы лебізін білдірді.
Турнирге 15 команда ат салысып, кіл мықтылар анықталды. Зайсан, Қаратал, Шілікті команда ойыншыларына және көрермен қошаметіне ие болған: «Ұздік шабуылшы» - Н.Қайрат, «Ұздік ойыншы» - С.Дауренұлы, А.Кәкеев, «Ұздік қорғаушы» - С.Құмарбеков. Осы спорттық ойынға төрелік жасаған О.Иманбаев, Е.Қалимулла, Г.Сейілханов, Н.Қайратулы, М.Балшабеков, Ф.Болатулы арнайы медальдармен, кубоктармен ақшалай сый-сияпаттарын тапсырды. Турнирдың жабылу рәсімінде Оспановтардың отбасына, туған-туыстарына алғыс жолданды.
Азамат боп өттің бұл өмірде...
Біртуар арман болып қалдың сен бүкіл елдің жүрегінде!
Жұлдызды ғұмыр жүректен өшпей, жас ұрпаққа үлгі болып!
Сауле Серікбаева,
Зайсан ауданы «М.Дауленов атындағы мектеп-интернаты» КММ бастауыш кәсіподақ төрағасы.
-
Фотографии
-
