ЖҰМЫСШЫ МАМАНДЫҚТАР ЖЫЛЫ: АДАМ ЕҢБЕГІМЕН ҚАДІРЛІ
Тазалық – әрбір адамның жаны қалайтын, терең мағынаға толы ұғым. Бұл жай ғана сөз емес, адамның өмірін, болашағын, тіпті имандылығы мен адамгершілігін қамтитын киелі құндылық.
Мыңбаева Светлана Құдайбергенқызы – осындай тазалықты ту еткен жандардың бірі. Ол 1961 жылы 29 наурызда Павлодар облысының Лебяжі ауданындағы Ямышево ауылында дүниеге келген. Павлодар құрылыс колледжінде «Әрлеуші» мамандығын игерген.
Кез келген ғимаратқа кіргенде, ең алдымен көзімізге түсетіні – тазалық. Алайда, көбінесе сол тазалықты орнатушы жандардың еңбегін елемейміз. Ең адал да ауыр жұмысты атқаратын – осы тазалықшылар. Олар таңнан кешке дейін күл-қоқысты тазалап, біздің таза ортада өмір сүруімізге жағдай жасайды. Светлана Құдайбергеновна 2021 жылдан бері Шығыс Қазақстан облысы Алтай ауданы «Серебрянск қаласының №4 орта мектебі» КММ-де қызмет етеді.
Осы уақыт ішінде ол өз жұмысына деген жауапкершілігін көрсете білді. Мектеп ұжымымен, оқушылармен тез тіл табысып, үлкенді сыйлап, кішіге қамқор бола білетін Света апай баршаның құрметіне бөленген. Ол – әрдайым күлімсіреп жүретін, адамдардың еңбегін бағалай білетін жан. Ендеше, осындай жандардың еңбегін әрқашан да қадірлейік!
