ҒАСЫР САЗЫН ТЕРБЕГЕН – НҰРҒИСА
КСРО халық әртісі, дәулескер күйші, талантты дирижер, Халық Қаһарманы, ғасыр композиторы Нұрғиса Атабайұлы Тілендиевтің 100 жылдығына арналған «Ғасыр сазын тербеген – Нұрғиса» атты мерейтойы Тараз қаласындағы Нұрғиса Тілендиев атындағы облыстық мектеп-интернатта салтанатты жағдайда аталып өтті. Кешке жиналған қонақтар алдымен сурет және қолөнер көрмесімен танысты. Ал дәулескер күйшінің рухына арналған іс-шараны облыс әкімдігі білім басқармасының бөлім басшысы Айдын Досыбаева және Жамбыл облысының білім саласында сапаны қамтамасыз ету департаментінің бас маманы Фатима Иманбекова ашып, жиынның мәні мен мағынасына терең тоқталды.
Бұдан кейін білім саласының ардагерлері Бәтес Егембердиева, Айман Садықова, Камилаш Ахметжанова, жазушы-ақын Үміт Битенова, Қазақстанның еңбек сіңірген қайраткері Асқарбек Сейілхан және облыстық білім басқармасына қарасты мектеп-интернат директорлары Нұрғиса Тілендиевтің ескерткішіне гүл шоқтарын қойды. Қонақтар мектеп ауласында аталған білім ошағының мұғалімдерінен құралған оркестрінің өнерін тамашалады. Олар Нұрғиса Атабайұлының «Ата толғауы», «Аққу» күйлерін төгілте орындап берді.
Іс-шара барысында мектепте Нұрғиса Тілендиев атындағы музыкалық кабинет ашылып, мектеп оқушылары мектеп музейімен таныстырды. Мерекелік концерттік бағдарлама мектеп-интернаттың мәжіліс залында жалғасын тауып, жиналған қауым өнерпаз оқушылардың «Ғасыр сазын тербеген – Нұрғиса» атты концертін тамашалады. Мұнда «Нұр ата» оқушылар оркестрі әйгілі композитордың «Мұрагер», «Ата толғауы» күйлерін орындаса, оқушы Гүлназ Ғаниқызы ақын Үміт Битенованың арнау өлеңін көпшілікке толғана жеткізді. Мұнан соң «Жамбылдың Нұрғисаға бата беруі» атты көрініс қойылды. Келесі сәтте «Нұр ата» оркестрі орындаған Нұрғисаның «Құстар» әнін барша көпшілік қосыла шырқады. Әнін Элдар Төрағали жазған «Нұрғиса мектебінің гимні» де елдің жүрегіне жетті.
Жиын соңында Жергілікті кәсіподақ төрағасының орынбасары Жанболат Орынбеков, ардагер ұстаз Бәтес Егембердиева және мектеп-интернаттың алғашқы директоры Камилаш Ахметжанова, айтыскер ақын Есет Досалы сөз алып, мектеп-интернат тарихындағы Н.Тілендиев есімі берілген уақыттан бері ұжымның атқарған іс-шараларына тоқталып, алғыс білдірді. Кешті мектеп-интернат директоры Гүлзира Тойшыманова қорытындылап, барша қонақтарға рахмет айтып, алғысын білдірді.
Жамбыл облысы оқу-ағарту, ғылым және жоғары білім қызметкерлерінің жергілікті кәсіподағы.
-
Фотографии
-
