ӨЗ ІСІНІҢ ШЕБЕРІ
Ұстаз — ұлы тұлға. Ұстаздық жолды жүрек қалауымен таңдаған, әр шәкіртінің жүрегінен жол тауып, білім мен тәрбиенің дәнін себуші жандардың бірі - Хромтау ауданы, Құдықсай ауылының тумасы Мұқанова Мереке Жұланқызы.
Мереке Жұланқызы 1975 жылы 7 тамызда дүниеге келген. Орта білімді туған ауылындағы мектепте алып, кейін Қ.Жұбанов атындағы Ақтөбе мемлекеттік университетінде 1992–1997 жылдары математика пәні мұғалімі мамандығы бойынша жоғары білім алған. Білім алып, үлкен өмірге жолдама алған жас маман еңбек жолын 1997 жылы №1 Хромтау орта мектебінде бастайды. Содан бері осы білім ордасында үздіксіз еңбек етіп келеді.
27 жылға жуық ұстаздық тәжірибесі бар Мереке Мұқанова - жаңашыл, шығармашыл, ізденімпаз әрі кәсіби шебер ұстаз. Ол өз пәнін терең меңгерген, білім берудің заманауи талаптарына сай әдіс-тәсілдерді шебер қолдана алатын педагог-зерттеуші. Мереке Мұқанова үшін әрбір сабақ — шығармашылық алаңы. Оқушылардың логикалық ойлау қабілетін дамыту, өз бетімен ізденуге, зерттеуге баулу - ұстаздың басты мақсаты. Ол сабақтарында инновациялық әдіс-тәсілдерді, цифрлық ресурстарды тиімді пайдалана отырып, оқушылардың пәнге деген қызығушылығын арттырады. Математика пәнін оқытуда жоғары кәсіби біліктілігімен ерекшеленіп, нәтижелі еңбегімен танылып жүр.
Ұстаздың шәкірттері жыл сайын аудандық, облыстық, республикалық деңгейдегі пәндік олимпиадалар мен ғылыми жобаларда жүлделі орындарды иеленуде. Сонымен қатар, дарынды оқушылармен жеке жұмыс жүргізіп, олардың қабілеттерін ұштап, үлкен биіктерге жетелеуде.
Мұқанова Мереке Жұланқызы — білім беру саласындағы тынымсыз еңбегі мен кәсіби шеберлігінің нәтижесінде бірнеше мәрте республикалық, облыстық және халықаралық деңгейдегі байқаулар мен олимпиадалардың жеңімпазы атанған. Атап айтқанда, ол «Педстарт» және республикалық пәндік педагогикалық олимпиадаларда, «Формула успеха» халықаралық олимпиадасында, «Шығармашылық педагог», «Үздік ашық сабақ», «Үздік портфолио» сынды байқауларда жүлделі орындарды иеленіп, «Қазақстан ұстазы» энциклопедиясына енген. Сонымен қатар, облыстық пәндік және педагогикалық олимпиадаларда, «Математикалық регата» сайысында үздік нәтижелер көрсетіп, жоғары дәрежелі дипломдармен марапатталған. Бұл жетістіктер ұстаздың білім беру ісіне сіңірген зор еңбегі мен шығармашылық ізденісінің айқын дәлелі.
Мұқанова Мереке Жұланқызы — өз ісінің шебері, жаңашыл ойлайтын, шәкірт жүрегіне жол таба білген шынайы ұстаз. Бүгінгі ұрпақтың сапалы білім, саналы тәрбие алуына сүбелі үлесін қосып жүрген мұғалімнің еңбегі ел үшін қашан да құрметке лайық.
