Новости территориальных организаций

Алакөл ауданында Қазақстан Республикасы Еңбек кодексіндегі жұмыс берушінің міндеттерін түсіндіру, еңбек қатынастарындағы құқықтық сауаттылықты арттыру мақсатында көшпелі семинар ұйымдастырылды.
Шараны Қазақстан Республикасы Еңбек және халықты әлеуметтік қорғау министрлігінің Еңбек инспекциясы комитетінің Жетісу облысы бойынша департаменті мен Оқу-ағарту, ғылым және жоғары білім қызметкерлерінің «Жетісу» жергілікті кәсіподағы бірлесіп өткізді.
Семинарға аудан мектептерінің басшылары, кадр мамандары мен кәсіподақ ұйымдарының төрағалары қатысты. Жиын барысында еңбек қатынастары, ұжымдық шарт жасау тәртібі, қызметкерлердің құқықтары мен міндеттері кеңінен түсіндірілді. 
Жиынды облыстық кәсіподақ ұйымының төрағасы Мэлс Төлепбергенов ашып, кездесудің басты бағыты еңбек заңнамасын сақтау, жұмыс беруші мен қызметкер арасындағы қатынасты заң шеңберінде реттеу сынды мәселелерге негізделгенін жеткізді.
Семинар еркін форматта өтті. Қатысушылар өздерін толғандырған сұрақтарын қойып, нақты жауаптар алды. Сондай-ақ еңбек қауіпсіздігі мен әлеуметтік кепілдіктер мәселелері де назардан тыс қалмады.
Жетісу облысы бойынша Мемлекеттік еңбек инспекциясы департаментінің Еңбек қауіпсіздігін бақылау және еңбекті қорғау бөлімінің басшысы Еркін Даулетұлы, Алакөл ауданы прокурорының орынбасары Бүркіт Нұрмұханбетов, облыстық ұйымның заңгер-кеңесшісі Әсет Қайырхан еңбек дауларына қатысты заң аясындағы түсініктемелер беріп, қатысушыларға кеңес ұсынды.
Осындай көшпелі семинарлар аймақтағы еңбек мәдениетін арттырып, құқықтық олқылықтардың алдын алуға бағытталған маңызды шара екені айтылды.
 
Жетісу облыстық кәсіподақ ұйымының баспасөз қызметі