КОЛЛЕДЖ ҰЖЫМЫ МЕН КӘСІПОДАҚ ӨКІЛДЕРІНІҢ КЕЗДЕСУІ
Шығыс Қазақстан облысы Үлкен Нарын ауданыңда орналасқан білім ордасы – «Үлкен Нарын колледжі» КММ-де ШҚО жергілікті кәсіподақ өкілдерінің қатысуымен кездесу өтті. Кездесудің мақсаты - кәсіподақ активі мен колледж ұжымы арасындағы ынтымақтастық пен өзара түсіністікті нығайту және әлеуметтік әріптестікті дамыту.
Кездесуді Шығыс Қазақстан облысы оқу-ағарту, жоғары білім, ғылым және басқа бюджеттік ұйымдар қызметкерлерінің жергілікті кәсіподақ төрағасы Назгуль Касенова жылы лебізбен ашты. Өз сөзінде кәсіподақ ұйымдарының қоғамдағы рөлі мен маңыздылығына тоқталып, ұжым мүшелерінің құқықтарын қорғау, әлеуметтік жағдайларын жақсарту бағытындағы атқарылып жатқан жұмыстарды атап өтті. Кәсіподақ өкілдері өз баяндамаларында Шығыс Қазақстан облысы жергілікті кәсіподағының қызметі мен екіжақты келісім аясындағы міндеттемелердің орындалуы туралы жан-жақты мәлімет берді.
Үлкен Нарын колледжінің директоры, Айбек Байгунусов өз сөзінде колледж әкімшілігі мен кәсіподақ ұйымы арасындағы тығыз байланыстың оң нәтижелерін атап өтті. Ол екі тараптың да ынтымақтастығы арқылы қызметкерлердің әл-ауқатын арттыруға, оқу орнының дамуына және ұжымда қолайлы психологиялық ахуал қалыптастыруға мүмкіндік туатынын жеткізді.
2025 жыл киелі шаңырақ, колледждің 90 жылдық мерейтой жылы! Осы айтулы мерекеге орай Назгүл Қасенова құттықтау лебізін білдіріп, ұжымға 100 мың теңге көлеміндегі сертификатты сыйға тартты. Ол колледж ұжымына шығармашылық шабыт, толағай табыстар және кәсіби шыңдарды бағындыруды тіледі.
Кездесу барысында қызметкерлерінің көкейінде жүрген сауалдары талқыланып, оларға тиісті жауаптар берілді. Атап айтқанда, еңбек заңнамасының сақталуы, әлеуметтік қолдау көрсету шаралары сынды мәселелер көтерілді. Кәсіподақ өкілдері әрбір сұраққа мұқият жауап беріп, қызметкерлердің құқықтарын қорғауға бағытталған нақты қадамдар жасалатынын айтты.
Кездесу соңында Назгүл Қасенова барлық қатысушыларға белсенділіктері үшін алғысын білдіріп, кәсіподақ ұйымының әрбір мүшесінің пікірі маңызды екенін еске салды. Ол ұжымдық жұмыстың арқасында ғана оң нәтижелерге қол жеткізуге болатынын атап өтіп, алдағы уақытта да кәсіподақ ұйымы қызметкерлердің мүддесін қорғау жолында аянбай еңбек ететінін жеткізді.
-
Фотографии
-
