ЕҢБЕК АДАМЫ
Өмірін ұрпақ тәрбиесіне арнап, өз ісіне адал қызмет етіп келе жатқан еңбек адамдарының бірі – шалқарлық ұстаз Нұрғайша Болатқызы Есмағанбетова. Ол бала тәрбиесіне саналы ғұмырын арнап, білім мен тәрбие беру ісін жоғары мұрат еткен ұлағатты ұстаз.
Нұрғайша Есмағанбетова - Шалқар ауданы №6 жалпы орта білім беретін мектепте бастауыш сынып мұғалімі болып еңбек етеді. Білім беру саласында 35 жылдан астам уақыт жұмыс істеп келе жатқан ұстаз. 1978 жылы №2 орта мектепке қабылданып, 1990 жылы Ақтөбе педагогикалық институтын бітіріп, мектептегі қызметін бастайды. 1999 жылы Қ.Жұбанов атындағы Ақтөбе университетті тәмамдап, бастауыш сынып мұғалімі мамандығын алады. Сол жылдан бастап №6 мектепте үздіксіз ұстаздық қызметін атқарып келеді. Қазіргі таңда ол – зерттеуші-педагог және ҚР Білім беру ісінің үздігі.
Кәсіби шеберлігін үздіксіз шыңдап келе жатқан Нұрғайша Есмағанбетова түрлі біліктілік курстарынан өтіп, педагог-зерттеуші санатына ие болды. Ол республикалық және облыстық байқауларда («Жыл мұғалімі», «Кемеңгер ұстаз», «Үздік эссе», «Үздік ашық сабақ») жүлделі орындарға ие болып, аудандық және облыстық марапаттармен де бағаланды.
Нұрғайша Есмағанбетованың еңбегі – оның шәкірттерінің жетістігімен айқындалады. Оқушылары республикалық сайыстар мен олимпиадаларда жүлделі орындарға ие болып, ұстазының еңбегін жарқын нәтиже арқылы көрсетіп келеді. Сонымен қатар, ол ұжымдастары арасында беделді, ақылшы, кәсіподақ жұмыстарына белсенді қатысатын ұстаз.
Есмағанбетова Нұрғайша Болатқызы – өз ісіне адал, шәкірт жүрегіне жол таба білетін және ұрпақ тәрбиесіне өмірін арнаған нағыз еңбек адамы.
