ҰЖЫМДАҒЫ СЕНІМ МЕН АШЫҚТЫҚ
Еңбек дауларын тиімді шешу, ұжым ішіндегі өзара түсіністік пен әлеуметтік тұрақтылықты сақтау – әрбір мекемедегі келісу комиссияларының басты міндеті. Осы бағытта Ақтөбе облыстық білім және ғылым қызметкерлері кәсіподағы жүйелі түрде жұмыс жүргізіп келеді.
Кәсіподақ бастамасымен ұйымдастырылып отырған семинарлардың негізгі мақсаты – еңбек дауларының алдын алу, келіссөз мәдениетін жетілдіру және комиссия мүшелерінің құқықтық сауаттылығын арттыру. Бұған дейін бірқатар кәсіподақ ұйымдарында өткен оқыту шаралары бұл жолы Ақтөбе облыстық оқу-әдістемелік орталығы мен “Ақтөбе-Дарын” өңірлік ғылыми-тәжірибелік қосымша білім беру орталығында жалғасын тапты.
Кездесу барысында облыстық ұйымның заңгерлері еңбек қатынастарын реттеудегі кәсіподақтың рөліне тоқталып, келісу комиссиялары жұмысының маңызын кеңінен түсіндірді. Қатысушыларға еңбек дауларының түрлері, оларды қарау тәртібі, тиімді келіссөз жүргізу тәсілдері, сондай-ақ комиссия мүшелерінің құқықтары мен міндеттері жөнінде жан-жақты ақпарат берілді.
Семинар ашық диалог форматында өтіп, қатысушылар өзара пікір алмасып, тәжірибелерімен бөлісті. Көкейде жүрген сауалдарға нақты жауаптар беріліп, практикалық мысалдар арқылы түсіндіру жұмыстары жүргізілді.
Айта еетейік, бүгінгі таңда келісу комиссиялары тек дауды қарайтын орган емес, еңбек қатынастары мәдениетін қалыптастыратын маңызды құрылымға айналып отыр. Осындай жүйелі оқыту жұмыстары комиссия мүшелерінің біліктілігін арттырып қана қоймай, ұжымдағы әділдік пен ашықтық қағидаттарын орнықтыруға қызмет етеді.
Сонымен қатар облыстық кәсіподақ өкілдері Ақтөбе облыстық оқу-әдістемелік орталығында, “Ақтөбе-Дарын” өңірлік ғылыми-тәжірибелік қосымша білім беру орталығында және Ақтөбе сервис колледжінде болып, бастауыш кәсіподақ ұйымдарына әдістемелік көмек көрсетті. Қоғамдық бақылау жүргізіліп, ұйым төрағаларының жылдық есептері тыңдалды.
-
Фотографии
-
