ЕҢБЕК АДАМЫ
Мұғалім маманы- нағыз еңбектің адамы, болашақтың көшбасшысы, сегіз қырлы, бір сырлы жан.
Білім беру кеңістігінде тәжірибелі де білімді, өз мамандығының хас шебері атанған кәсіби ұстаздар жетерлік. Солардың бірі— саналы ғұмырының ширек ғасырға жуығын ұстаздық атты ұлы мамандыққа арнаған білікті маман Мұқашева Кенжегүл Серікқалиқызы.
Кенжегүл Серікқалиқызы 1979 жылдың 27 қаңтарында Ақтөбе облысының Әйтеке би ауданының , Жабасақ елді мекеніне қарасты Аққұм ауылында дүниеге келген. 1995 жылы Жабасақ орта мектебін бітіріп, 1997 жылы Қ.Жұбанов атындағы Ақтөбе мемлекеттік университетінің филология фаультетіне оқуға түседі. 1998 жылы сырттай бөлімде оқуына байланысты Талдысай мектебіне қазақ тілі мен әдебиеті пәнінің мұғалімі болып жұмысқа орналасады .
2002 жылы университетті бітіріп, «Kәсіптік жоғары білімді қазақ тілі мен әдебиеті мұғалімі» мамандығын игереді.
Еңбек өтілі— 24 жыл . Оның 14 жылында директордың тәрбие ісі жөніндегі орынбасары қызметін атқарып, бірнеше жетістіктерге қол жеткізді.
Кенжегүл Серікқалиқызы өзінің адамгершілік қасиеттерімен, кәсіби біліктілігімен оқушылардың сүйікті ұстазы, сыйлы әріптеске айнала білді. Ол мектепішілік шаралардың жоғары деңгейде өтуіне тікелей араласып, өзі бірге атқарысып , оқушымен де, ата-анамен де, ұстаздармен де бірлесе етене жұмыс жасай білетін көшбасшы мұғалім.
Кенжегүл Серікқалиқызы өзінің іс-тәжірбиесімен бөлісу мақсатында аудандық, облыстық, республикалық шаралараға белсене қатысып, төмендегідей жетістіктер мен марапаттарға ие болған:
- 2017 жылы «Директордың тәрбие жұмысы бойынша үздік орынбасары» аудандық байқауында «Бас жүлде» иеленіп, облыстық байқауда «Креатив орынбасар » номинациясын иеленген .
- Ұлы Отан соғысының Жеңісіне 75 жыл толу мерейтойына орай өткізілген «Ең үздік тәрбие сағаты» облыстық байқауына қатысып, 1 орын иеленді.
- «Ұстаз-ұлағатты ұғым» республикалық эссе конкурсынан 1 орын жүлдегері атанды.
- «Қазақ тілі» пәнінің мұғалімдеріне арналған Республикалық қашықтық олимпиадасынан 1 орын алды.
- Халықаралық ғылыми- педагогикалық білімді дамыту академиясының «Жылдың үздік мұғалімі-2019» байқауынан 2 орын иеленді.
- «Тиімді сабақ: белсенді әдіс және нәтижелі жетістік » тақырыбындағы облыстық кәсіби байқауының 3 орын иегері.
- қазақ тілі мен әдебиеті пәнінің мұғалімдеріне арналған республикалық, облыстық олимпиадада 2 орын иеленген.
-2021 жылы аудандық «Ұстаз-мектеп айнасы» атты байқау жеңімпазы атанып, аудандық білім бөлімі мен кәсіподақ ұйымы атынан «Ақжайық» шипажайына жолдама берілген.
-ҚР Тәуелсіздігінің 29 жылдығы қарсаңында Ақтөбе облысының білім басқармасы, Ақтөбе облыстық білім және ғылым қызметкерлері кәсіподақ ұйымының Алғыс хатыпен марапатталған.
Кенжегүл Серікқалиқызының оқушылары аудандық , облыстық эссе жазу, мәнерлеп оқу, КТК , дебат ойындарының ,пәндік олимпиадалардың жеңімпаздарының қатарынан көрініп жүр.
