СЫР ЖЕРІНДЕ ҰСТАЗ-АНАЛАРҒА ҚҰРМЕТ КӨРСЕТІЛДІ
Ұстаздың қоғам мен адамзат алдындағы еңбегі өлшеусіз. Қызылорда облысы, Арал аудандық білім бөлімінің және аудандық білім қызметкерлері кәсіподақ комитетінің ұйымдастыруымен Ұ.Қараманов атындағы №262 мектеп-гимназиясында санитарлық талапты сақтай отырып, 8 наурыз – Халықаралық әйелдер күні мерекесіне орай «Ана - әлемнің шуағы» тақырыбында салтанатты шара өткізілді.
Салтанатты шара қуанышы мен үміті көп білім беру саласында көп жылдар еңбек етіп, ортақ шаңырағымыздың жарқын келешегі үшін ақ батасын беріп, елдің тілеуін тілеп жүрген ардагер ұстаз аналарға арналды.
Мерекелік басқосуда Арал ауданы бойынша білім бөлімінің басшысы Санира Жанназарова және аудандық білім қызметкерлері кәсіподақ комитетінің төрағасы Жұмабай Мирманов ардақты аналарды көктемнің шуақты мерекесімен құттықтап, сый-сияпаттар жасады.
Сонымен қатар, шара барысында аналарға сөз беріліп, қызығы мен қиындығы қатар жүретін ұстаздық жолындағы қызықты сәттеріне арналған сұрақтар қойылды және ардагер ұстаздар теледидардан, баспа беттерінен, әлеуметтік желі арқылы білім саласының бүгінгі жаңалықтарынан хабардар екендіктерін, атқарылып жатқан жұмыстарға, оқушы жетістіктеріне оң бағасын беріп, ақжарма тілектерін білдірді.
Ардагер ұстаздарға аудандық Өнер мектебінің және №262 мектеп-гимназиясы өнерпаздарының мерекелік ән-шашуы ұсынылып, ерекше көңіл - күй сыйлады.
Қызылорда облысы Арал аудандық білім және ғылым қызметкерлері кәсіподақ комитеті
