«ЗОРЛЫҚ-ЗОМБЫЛЫҚСЫЗ 16 КҮН»
Маңғыстау облысында 25 қарашада басталған «Зорлық-зомбылықсыз 16 күн» республикалық акциясы аясында кәсіподақ ұйымдарының бастамасымен іс-шаралар өткізіліп жатыр. Негізгі мақсат - әйелдерді өз құқықтары туралы хабардар ету, отбасылық-тұрмыстық жағдайларда жасалатын құқық бұзушылықтардың алдын алу және отбасының қоғамдағы рөлін күшейту. Сондай шаралардың бірі Маңғыстау облысы білім және ғылым қызметкерлерінің жергілікті кәсіподағының мәжіліс залында өтті.
Жиынға облыстық кәсіподақ ұйымы мен кәсіподақ мүшелері – білім беру ұйымдарында жұмыс істейтін қыз-келіншектер қатысты. Жиынды облыстық кәсіподақ ұйымының ұйымдастыру қызметтері жөніндегі маман Асылтас Аманиязова әйелдерге қатысты түрлі дискриминация түрлерін жою туралы конвенцияға сәйкес жыл сайын «Әйелдерге қатысты зорлық-зомбылықсыз 16 күн» акциясы өтетінін, акцияның мақсаты - әйелдерге қатысты зорлық-зомбылықтың ең көп таралған түрі - отбасылық-тұрмыстық зорлық-зомбылықты болдырмау мен әйелдердің заңды мүдделері мен құқықтарын қорғау және тұрмыстық қылмыстардың алдын алу екендігін атап өтті.
Іс-шарада арнайы баяндама жасаған Қазақстандық халықаралық адам құқықтары және заңдылық бюросының Маңғыстау филиалының директоры, «Мейірім» ҚБ төрағасы, модератор, Александр Викторович Муха әйелдерге қатысты зорлық-зомбылықтың алдын алу, сондай-ақ ана мен баланы қорғау және қоғамда отбасының рөлін нығайту бойынша облыста жасалып жатқан жұмыстарға тоқталды.
1998 жылы 29 маусымда еліміз БҰҰ-ның «Әйелдерге қатысты кемсітудің барлық нысандарын жою туралы» Конвенциясына қосылды. Осылайша, өзіне Қазақстандағы әйелдерді кемсітудің барлық түрінен қорғауға міндеттеме алды. Бүгінде қоғамда тек ерлі-зайыптылар арасындағы жанжалдар салдарынан әйелдер ғана емес, зейнеткерлер де зорлық-зомбылық құрбаны болып жатады.
Қоғамда зорлық-зомбылық, моральдық зиян келтіру фактілері жиі кездеседі. Ал онымен қоғам болып күрескенде ғана нәтиже шығары анық, - деді модератор өз сөзінде.
Жиынға қатысушылар отбасында зорлық-зомбылық көрген әйелдер қайда бару керектігін білмейді немесе олар дау одан әрі ушығып кетеді деп қорқады, осыған байланысты осындай мәселелерді түсіндіру бойынша кездесулерді мүмкіндігінше жиі өткізу қажет деген ұсыныстарын жеткізді.
«Қазақстандық салалық білім және ғылым қызметкерлері
кәсіптік одағының Маңғыстау облыстық ұйымы» ҚБ
кәсіптік одағының Маңғыстау облыстық ұйымы» ҚБ
