КЕЛІСУ КОМИССИЯСЫНЫҢ МҮШЕЛЕРІ ОҚУДАН ӨТТІ
Мамырдың 19 күні өткен «Еңбек даулары және оларды шешудегі келісу комиссияларының рөлі. Еңбек дауларын сотқа дейінгі және сотта қарау тәжірибесі» атты семинарға Сарысу, Талас, Жуалы аудандары мен Тараз қаласының, сонымен бірге М.Х.Дулати атындағы ТарӨУ-нің Келісу комиссиясының мүшелері қатысты. Қатысушылардың қатарында жұмыс беруші өкілдері - білім бөлімдерінің, білім беру ұйымдары мен мекемелерінің басшылары, сондай-ақ, бастауыш кәсіподақ ұйымының төрағалары болды.
Семинарға модератор ретінде Жамбыл облысы білім және ғылым қызметкерлерінің Жергілікті кәсіподағының төрағасы Е.Мағзымбеков, төраға орынбасары-құқықтық қызмет басшысы Б.Баймағамбетов, Кәсіподақтың құқықтық және кадр қызметінің бас маманы Ә.Джолшибекова, Кәсіподақтың Тараз қалалық филиалының құқықтық сұрақтар жөніндегі бас маманы А.Стыбаев және Жамбыл облыстық еңбек инспекциясының мемлекеттік еңбек инспекторы Мұхаметқали Туғанбаев қатысты.
Семинардың ашылуында Кәсіподақ төрағасы Ерұлан Мағзымбеков әр деңгейдегі Келісу комиссиясының мүшелерін оқыту аса маңызды болып табылатынын, комиссия тараптары комиссия мүшелерін Қазақстан Республикасының еңбек заңнамасының негіздері, келіссөздер жүргізе білуді дамыту және еңбек дауларында бәтуаластыққа келу жөнінде жыл сайынғы оқытудан өткізуге міндетті екенін айтып, іс-шара осы мақсатты көздейтінін жеткізді.
Семинардың өн бойында Келісу комиссиясын құру, онда қаралатын мәселелер, комиссияның іс құжаттарын рәсімдеу мен жүргізу тәжірибесі, еңбек даулары жөніндегі комиссия шешімдерінің орындалу тәртібі, жекелеген даулар бойынша шешімдерді шығару мен олардың орындалу тәртібі, еңбек дауларын қарау және Келісу комиссиясына немесе сотқа жүгіну мерзімдері сынды сұрақтарға жауап берілді. Ал практикум сағатында тыңдаушылар үш топқа бөлініп, алған білімдерін бекіте түсті.
Барлық қатысушыларға семинарға қатысқандығы туралы куәлік берілді.
Б.Бекназаров,
Жамбыл облысы
-
Фотографии
-
