ҰЖЫМДЫҚ ШАРТ – ЕҢБЕК ҚАТЫНАСТАРЫНЫҢ МАҢЫЗДЫ ҚҰРАЛЫ
Жамбыл облысы білім және ғылым қызметкерлері жергілікті кәсіподағының Сарысу аудандық комитеті мен аудандық білім бөліміне қарасты 49 еңбек ұжымы арасында 2018-2020 жылдарға арналған ұжымдық шарт жасалған. Ұжымдық шарттың 13.3 тармағына сәйкес тараптардың еңбек ұжымдары алдында есеп беруі көзделген.
Осы орайда, ZOOM платформасымен онлайн режимде барлық бастауыш ұйымдарында жұмыс берушінің Ұжымдық шарт талаптарын орындау барысы, бастауыш кәсіподақ ұйымы төрағасының есебі, еңбекті қорғау жөніндегі Өндірістік кеңес төрағасының есебі мен Бақылау-тексеру комиссиясының есептері қаралған жиындар өтті. Қорытынды жиын ретінде Сарысу аудандық комитетінің III Пленумы саналып, онда Кәсіподақтың Сарысу аудандық комитеті мен білім бөлімінің есептері тыңдалды.
Есеп беру барысында аудандық білім қызметкерлері кәсіподақ комитетінің төрайымы Г.Сұлтанбекова комитеттің есепті мерзімде атқарған жұмыстарына жан-жақты тоқталып, әлеуметтік әріптестік мақсатындағы ұжымдық шарт міндеттерінің орындалу барысына талдау жасады. Жұмыс беруші тараптан Г.Кабулова әлеуметтік әріптестіктің нәтижесінде қызметкерлердің еңбек ақысын уақтылы төлеу, еңбекке жарамсыздық парағын ұсынған қызметкерлерге әлеуметтік жәрдемақыларын толық төлеу, педагогтардың біліктіліктерін арттыру курстарынан өтуі, жыл сайығы кезекті еңбек демалысына жіберу бойынша төлемдер толық өтеліп жатқандығы және басқа мәселелер оң шешімін тауып отырғандығын жеткізді. Сондай-ақ, білім беру мекемелерінің материалдық-техникалық базаларын жаңарту бойынша нәтижелі жұмыстар атқарылғанын тілге тиек етті.
Негізгі баяндамалардан соң жарыссөзге шыққан кәсіподақтың құқықтық еңбек инспекторы М.Әбдіров, М.Әуезов атындағы мектеп-гимназиясының директоры Р.Қамбарбаева, Әйтеке би атындағы орта мектебінің еңбекті қорғау жөніндегі инспекторы А.Икежанов атқарылған жұмыстар, қол жеткен нәтижелер, алдағы жоспарлар туралы айтты.
2018-2020 жылдарға жасалған Ұжымдық шарттың мерзімі аяқталып, 2021-2023 жылдарға арналған Ұжымдық шарт жобасы білім мекемелерінің бастауыш кәсіподақ ұйымдарының, жұмыс берушілер өкілдерінің қатысуымен әлеуметтік әріптестік аясында талқыланып жатқандығы да сөз болды.
П.Бақыт,
Жамбыл облысы
-
Фотографии
-
