Новости территориальных организаций

«Алматы облыстық білім және ғылым қызметкерлерінің кәсіподақ ұйымы» ҚБ-нің Кербұлақ аудандық филиалы мен жанынан құрылған Жастар кеңесі бірлесіп, «INSIGHT» интеллектуалды-спорттық жарысын ұйымдастырды.
Шараның мақсаты – жас ұстаздарды бір ортаға шоғырландыру, бос уақытты тиімді пайдаланып, өзара тәжіребие алмасу.
Аралтөбе негізгі мектебінің ғимаратында өткен жарысты аудандық Жастар кеңесінің мүшесі Гүлім Бименқызы ашып, көпшілікті жарыстың кезеңдерімен таныстырып, шараның өту барысын анықтап берді. Қатысушыларға сәттілік тіледі.
Жарысқа білім беру мекемелеріндегі жас мамандар қатысып, берілген реттік номер арқылы топқа бөлініп, интеллектуалды-спорттық жарыстың ережесіне сәйкес топтың атын және ұранын жылдам дайындап, шеберліктерін көрсетті.
Жарыс екі бөлімді және әр бөлім үш кезеңді қамтыды. «Қызықты екен» бөлімінде жас мамандар ұяшықтарға жасырылған қызықты сұрақтарға жауап берсе, келесі кезекте жабық қорапша ішіне жасырынған затты тауып, өз топтарының ұпай санын арттырды.
«Спорт - денсаулық кепілі» атты екінші бөлімде қатысушылар допты кедергілерден алып өтіп, топ мүшелері бір-біріне табыстады. Ал, жастардың білімі мен жылдамдылығы сыналатын кезеңде топ мүшелері секіргішпен секіруін тоқтатпай, жүргізуші айтқан мақалды жалғастырды.
Кербұлақ аудандық филиалының төрағасы Жақан Дуанаев, жастар Кеңесінің төрайымы Әсем Ильясова және Панфилов атындағы орта мектебінің директоры Серік Қожаханов сынды белсенділерден құралған әділқазы алқалары жүйріктерді анықтады.
Нәтижесінде І орынды «Болашақ» командасы, ІІ орынды «Қыран» командасы, ІІІ орынды «Ұмтылыс» командасы иеленді.
Шара соңында Кербұлақ аудандық филиалының төрағасы Жақан Ноғайбайұлы жас мамандардың көрсеткен өнерін жоғары бағалап, жеңімпаздарға дипломдар мен бағалы сыйлықтарды табыс етті. Қатысушылар да өз тараптарынан ұйымдастырушыларға алғысын білдірді.