МЕРЕКЕ ҚҰТТЫ БОЛСЫН, ҰСТАЗДАР!
Елімізде қазанның алғашқы жексенбісі – Мұғалімдер күні. Ұстаз – ұлт пен ұрпақ үшін қасиетті ұғым. Шәкірттерін білім нәрімен сусындатып, адамгершілік рухта тәлім-тәрбие беріп, жақсы қасиеттерді бойына дарытуда мұғалімнің еңбегі зор. Міне, сондықтан да ұстаздар күні қарсаңында мұғалімдерге құрмет көрсетіп, үздіктерін марапаттау дәстүрге айналған.
29 қыркүйек күні "Ұстаз, Сіз құрметке лайықсыз" тақырыбында өткізілген мерекелік шара барысында Қызылорда облыстық білім басқармасының басшысы Ақзира Қасымова мен Қызылорда облыстық білім және ғылым қызметкерлері кәсіподақ комитетінің төрайымы Гүлнар Есқалива бірқатар мұғалімдерді марапаттап, мерекелерімен құттықтады. Ұстаздар күні мерекесімен тұспа тұс келген қарттар күні мерекесіне орай 75 жас мерейтой иесі №171 орта мектептің ардагер ұстазы Әліпбаева Мадина Нұрасылқызы марапатталды. Сонымен қатар, қалалық білім жанындағы ұстаз ардагерлер кеңесінің төрағасы Баймбетов Мылтықбай Мұстафаұлы және белсенді кәсіподақ төрағалары "Құрмет грамотасын" иеленді. Шәкірт тәрбиелеудегі өлшеусіз еңбектері үшін бірқатар ұстаздар облыстық білім басқармасы мен кәсіподақ комитетінің бірлескен "Құрмет грамотасының" иегері атанды.
Білім негізінің сырына бағыт алдырып, өз әлемінде ойлануға үйреткен, таным баспалдағын қалыптастырған, ол әрине—алғашқы ұстаз. Бастауыш сыныпта білім нәрімен сусындатқан ұстаздардың еңбегі зор. Сол себепті 2019-2020 оқу жылының 153 "Алтын белгі" иегерлерінің 89 алғашқы ұстаздарына "Бір көлік" шипажайына жолдама берілді.
Барша ұстаздар қауымын тағы да мерекемен шын жүректен құттықтай отырып, өскелең ұрпақ тәрбиелеудегі өрелі жұмыстарына және мемлекеттің гүлденуі жолындағы абыройлы істеріне толымды табыс тілейміз.
О.Алимбетова,Қызылорда қалалық білім
қызметкерлері кәсіподақ комитетінің төрайымы
-
Фотографии
-
