МЕКТЕП БАСШЫСЫ – ҚОҒАМ КӨШБАСШЫСЫ
Өткені – өнеге, іргесі – ізгілік, керегесі – кемел игілікті істерге толы білім ордамыз алты жылды артқа тастап, жас ұрпақтың сапалы біліммен саналы тәрбие алуына өз үлесін қосып келеді. Бекем бірлік қағидасына сүйенген мектеп ұжымы осы кезге дейін көптеген биіктерді бағындарды. Әрине, осы орайда «Көреген басшы елді өсіреді»демекші,осындай үлкен ұжымды білікті басқарып отырған мектеп басшымыз Қаршагул Хамзаханқызының еңбегі ерең.
Әділбекова Қаршагүл Хамзаханқызы педагогикалық еңбек жолын осыдан 28 жыл бұрын тарих пәні мұғалімі қызметінен бастады. Мектепте еңбек еткен жылдары оқушылары аудандық, облыстық сайыстарда топ жарды. Мұнайлы ауданындағы №2 орта мектептегі директорлық қызметін абыроймен атқарып,№11 орта мектептің директоры қызметіне ауысты. Біз білетін Қаршагүл Хамзаханқызы ойы терең, интеллектуалдық потенциалы мол, педагогикалық шеберлігі жоғары деңгейдегі басшы және ұстаз. Өз пәні бойынша сабақ берумен қатар, мектеп ұжымының көшбасшы жетекшісі. Оқушылардың білім сапасын көтеру, ата-аналармен жүйелі жұмыс жүргізу, мектептің материалдық-техникалық базасын нығайту, мектеп қызметкерлерінің біліктілігін арттыру бойынша жұмыстары ұжым тарапынан қолдау тауып, көпшілік көңілінен шығуда. Жұмыс барысында жауапты, талапшыл, ұйымдастырушылық қабілеті жоғары. Басшылыққа келгелі «Жүйелі жоспар, нәтижелі сабақ, шығармашыл — ізденімпаз ұстаз» жұмыстарын ұйымдастырып, педагог жұмысының нәтижесінде шығармашыл тұлға, жаңалыққа бейім, өздігінен ғылыми ізденістер мен зерттеулер жасауға, өзін-өзі дамытатын, белсенді әрекетке түсе білетін, мәдениетті, эрудициясы жоғары, эстетикалық талғамы бар білімге, өнердегі жаңалықтарға қызығушылығы басым, шығармашылықпен өзін-өзі үздіксіз дамытып отыратын тұлға жасау жолында мектеп ұжымына жағдай жасап келеді. Себебі өзі басқарып отырған ұжымның басым көпшілігі жас мамандардан тұрады. Ұлы өмірлік ұстаз Абай Құнанбайұлы: «Адамның жақсы болуы тегінде емес, тәрбиесінде, ақылында, өнер-білімінде. Адамға үш алуан адамнан мінез жұғады: ата-анадан, ұстазынан, құрбысынан. Әсіресе, олардың қайсысын жақсы көрсе, содан көп жұғады» демекші, өз бойындағы бар білімді оқушы жүрегіне ұялата алар шеберлігінің арқасында, оқу-тәрбие жұмысын жүргізу кезінде оқушының психологиялық ой-өрісінің өсу, даму дәрежесін байқай алатын кәсіпқойлығымен ерекшеленеді. Қаршагүл Хамзаханқызы еңбексүйгіш, өз ісіне жауапкершілігі мол.
Тапсырылған жұмысты мүлтіксіз орындап, әрдайым ізденіс үстінде жүреді. Ол үнемі ізденіске толы өмір жолында қарапайым мұғалімдіктен жаңа тұрпатты мектеп басшысына дейінгі өнегелі баспалдақтардан өтті. Ауыз толтырып айтарлық мақсаттарын сөзбен емес, іспен көрсете білгендіктен әріптестерінің зор құрметіне, оқушылар мен ата-аналардың алдында үлкен беделге ие. Сабырлы, парасатты, мінезге бай, сұраған адамға көмегі дайын адам ретінде көпке үлгі. Өз кәсіби деңгейін ұдайы арттырып отыратын ұстанымы ерекше. Елеулі жетістіктерін айтар болсақ, оның өзі бір төбе. Облыс, аудан көлемінде Құрмет грамоталарымен, Алғыс хаттармен бірнеше мәрте марапатталды.
Қаршагүл Хамзаханқызы – ұлағатты ұстаз, білікті басшы болумен қатар, аяулы ана, өнегелі әже. Атадан қалған кәсіпті дамытып, еңбектерінен зейнет көріп отырған табиғат жанашыры ұстаздардың екінші үйі – мектепті де табиғатпен үндестірді. Оның дәлелі мектеп жанында бой көтерген заманауи үлгiдегi жылыжай. Жылыжай мектеп ұжымдары мен оқушылар үшiн үлкен жаңалық болды. Осылайша, оқушыларды табиғатпен таныстыруға, қоршаған ортаны аялауға деген адамның саналы көзқарасын, бала бойындаға экологиялық тәрбиені қалыптастыра білді.
Білікті басшы, ұлағатты ұстаз қос бестіктің жалына қол артып, ел болашағын тәрбиелеуде тынымсыз күндер мен түндерді артқа тастап, абырой биігінде келеді. Оның жеткен жетістігі, шыққан асуынан гөрі әлі қоғамға берері мол. Мектептің бәсекеге қабілетті білім ордасына айналуы оны басқарып отырған басшымыздың көшбасшылық қасиетінің арқасында деп білеміз. Демек, мектептің құлаш сермеп биіктерден көрінуі, қоғам дамуының себепшісі болары сөзсіз.
Рита Текеева,«Қазақстандық салалық білім жәнеғылым қызметкерлерінің
кәсіподағыныңМаңғыстау облыстық ұйымы» ҚБМұнайлы аудандық кәсіподақ ұйымыфилиалының төрайымы
