Новости территориальных организаций

Облысымыздың түкпір-түкпірінде тұнып жатқан небір өнерлі, сегіз қырлы бір сырлы талант иелерін, білім және ғылым саласының көркемөнерпаздық шығармашылықпен айналысатын дарынды қызметкерлерін анықтап, олардың шығармашылық мүмкіндіктерін ұштау, Елбасымыз Н.Ә. Назарбаевтың «Ұлы даланың жеті қыры» атты мақаласының тапсырмаларын орындау, сондай-ақ, кәсіподақ ұйымдарының шығармашылық белсенділігін арттыру мақсатында «Қазақстандық салалық білім және ғылым қызметкерлері кәсіптік одағы Атырау облыстық ұйымы» қоғамдық бірлестігінің ұйымдастыруымен «Егемен еліміздің еңселі ұстаздары» атты білім және ғылым қызметкерлері арасындағы көркемөнерпаздардың облыстық байқау фестивалі болып өтті. Шараны Атырау облыстық кәсіподақтар орталығы аумақтық кәсіподақтар бірлестігінің төрағасы Баймұханов Ізтұрған Ұзақбайұлы ашып, қатысушыларға сәттілік тіледі.
Білім және ғылым қызметкерлері дәстүрлі ән, көркемсөз – драмалық өнер, эстрадалық ән, хореографиялық өнер номинациялары бойынша сайысқа түсті. Байқау кезінде арнайы мамандардан құрылған қазылар алқасы мәтіннің орындалу шеберлігіне, ой тереңдігіне, көркемдік ерекшелігіне, дауыс мәнеріне тіл тазалығына, таңдалған шығарманың өзектілігі мен маңыздылығына, сахна мәдениетіне ерекше мән берді. Байқау қорытындысында «Дәстүрлі ән» номинациясы бойынша Индер ауданы, Б.Нысанбаев атындағы орта мектеп мұғалімі Бисенғалиев Бауыржан – I орын, Исатай ауданы, Ж.Мырзағалиев атындағы орта мектептің мұғалімі Меңдіғалиева Галина Қуанқызы – II орын, Қызылқоға ауданы, Х.Досмұхамедов атындағы орта мектептің мұғалімі – Арыстанғалиева Анар Алтыбайқызы III орын; «Эстрадалық ән» номинациясы бойынша Исатай ауданы, Өркен орта мектебінің мұғалімі – Баташев Абзал Ағидоллаұлы І орын, Атырау қаласы, №32 «Мөлдір» балабақшасының саз жетекшісі – Рысбаева Флара Амандыковна II орын, Мақат ауданы, «Ботақан» балабақша тәрбиешісі Жолмуханова Света Асқарқызы – III орын; «Хореография» номинациясы бойынша Мақат ауданы, Б.Қанатбаев атындағы орта мектептің директордың тәрбие ісі жөніндегі орынбасары Ұнағанов Жақсылық Шайхович – I орын, Жылыой ауданы, №16 орта мектептің информатика пәні мұғалімі Дүзелбаева Перизат Сергеевна – II орын, Индер ауданы, «Жауқазын» бөбекжай тәрбиешісі - Мұхтарова Нұрайым Мұхтарқызы III орын; «Көркем сөз шебері» номинация бойынша Қызылқоға ауданы, Жаңашаруа орта мектебінің мұғалімі Қойшығалиева Гүлфина Құсайынқызы – I орын, Мақат ауданы - №2 бастауыш мектеп директоры - Баймұқашев Руслан Теміржанұлы II орын, Жылыой ауданы- №3 орта мектептің қазақ тілі және әдебиеті пәні мұғалімі Жұмабергенова Айсана Жұмабергенқызы – III орындарды иеленді.
Байқау соңында «Қазақстандық салалық білім және ғылым қызметкерлері кәсіптік одағы Атырау облыстық ұйымы» қоғамдық бірлестігінің төрағасы Қ.Сүндетұлы барлық қатысушыларға өз алғысын білдіріп, байқаудан үздік шыққан өнерпаз педагогтарды арнайы дипломдармен және ақшалай сыйақымен марапаттады.
Өнер адамының қай салада жүрсе де, өз ортасынан оза шауып, көзге түсіп тұратындығы осы байқаудан анық көрініс тапты.

Сандуғаш ҚАПСИХОВА, «Ұстаздық еңбек». Атырау қ.