КОЛЛЕДЖ ҚЫЗМЕТКЕРЛЕРІНІҢ ӨНЕР БАЙҚАУЫ
«Атырау облысы білім және ғылым қызметкерлерінің кәсіптік одағы» қоғамдық бірлестігінің ұйымдастыруымен білім саласында еңбек етіп жүрген колледж қызметкерлері арасында «Егемен еліміздің еңселі ұстаздары» атты көркемөнерпаздардың облыстық фестивалі өтті. Фестивальдің мақсаты – білім саласының көркемөнерпаздық шығармашылықпен айналысатын дарынды қызметкерлерін анықтап, олардың шығармашылық мүмкіндіктерін ұштау және кәсіподақ ұйымдарының мәдениет саласындағы белсенділігін арттыру еді.
Х.Досмұхамедов атындағы Атырау университетінің акт залында өткен өнер сайысы басталмас бұрын қала мен аудандардан келген ұжым жетекшілері жеребе тартып, өздерінің сахнаға шығар сәттерін белгіледі.
Фестиваль шымылдығын «Атырау облысы білім және ғылым қызметкерлерінің кәсіптік одағы» қоғамдық бірлестігінің төрағасы Қылышбай Сүндетұлы сөз сөйлеп ашып, облысымыздың түкпір-түкпірінде тұнып жатқан өнерлі, сегіз қырлы бір сырлы кәсіподақ мүшелерінің ұстаздық пен өнерді бірдей алып жүргендерін атап өтті. Бүгінгі сахна төрінде бақ пен бап қатар шауып, тың талантты кәсіподақ белсенділері өнерлерімен таңдай қақтырады деп сенім білдірді.
Байқау жеңімпаздарын құрамында Н.Жантөрин атындағы Атырау облыстық филормониясының әншісі, ҚР Мәдениет қайраткері Ханзада Сакипова, Н.Тілендиев мамандырылған мектеп-гимназия-интернатының би бөлімінің оқытушысы Ы.Алтынсарин төсбелгісінің иегері Сауле Жаскеленова және «Д.Нұрпейісова атындағы Халықтық музыка Академиясы» Атырау музыка колледжінің дирижерлеу мамандығының оқытушысы Жақсылық Қайрат бар Қазылар алқасы анықтады.
«Егемен еліміздің еңселі ұстаздары» атты колледж қызметкерлері арасындағы көркемөнерпаздардың Атырау облыстық байқауының жеңімпаздары төмендегі номианациялар бойынша анықталды.
«Дәстүрлі ән» номинациясы бойынша:
Бірінші орынды Индер көп бейінді ауыл шаруашылығы колледжінен Өтеген Нұрмағамбетов, екінші және екі үшінші орындарды О. Көшеков атындағы Атырау аграрлы-техникалық колледжінен Гүлмира Шекртова мен Құрманғазы аграрлы-техникалық колледжінен Нұргүл Темірәлиева, Атырау энергетика және құрылыс колледжінен Базаргүл Көшербаевалар иеленді.
«Би» номинациясы бойынша:
Бірінші орынды Қызылқоға аграрлы техникалық колледжінен Салтанат Жексемалиева, екінші және екі үшінші орындарды Атырау энергетика және құрылыс колледжінен Айнаш Жакупбаева мен Атырау индустриалды колледжінен Жастар тобы, «Махамбет көп бейінді ауыл шаруашылығы колледжінен» Тоғжан Шуриевалар иеленді.
«Эстрадалық ән» номинациясы бойынша:
Бірінші орынды «Мақат мұнай және газ технологиялық колледжінен» Қуаныш Есенжан, екінші және екі үшінші орындарды Индер көп бейінді ауыл шаруашылығы колледжінен Айдос Жанғалиев мен «Махамбет көп бейінді ауыл шаруашылығы колледжінен» Айнагүл Ғаббасова, Құрманғазы аграрлы-техникалық колледжінен Келдібек Кисметоллаевтар иеленді.
Фестиваль жеңімпаздары арнайы дипломдармен және ескерткіш сыйлықтармен марапатталды.
«Атырау облысы білім және ғылым қызметкерлерінің кәсіптік одағы» ҚБ баспасөз қызметі.
-
Фотографии
-
