ҚЫЗЫЛОРДАДА КӨРНЕКТІ ҒАЛЫМДЫ ЕСКЕ АЛУҒА АРНАЛҒАН ТУРНИР ӨТТІ
Бүгін Сыр өңірінде ұлағатты ұстаз, білім саласының ардагері, біртуар азамат, педагогика ғылымдарының докторы, халықаралық педагогикалық білім беру ғылымдары академиясының корреспондент мүшесі - Бақытжан Әбдіқалықұлы Сайлыбаевты еске алуға арналған облыстық турнир өз мәресіне жетті.
Аталмыш турнир өткен жылдан бастап ұйымдастырылып келеді. Бақытжан Әбдіқалықұлы «Ұстаз» атты ұлы есімді биік ұстаған тұлға. Саналы ғұмырында шәкірттердің бойына білім сәулесін жағып, тәрбиелеп өсірді. Ұлағатты ұстаз білім берумен қатар 100-ге жуық ғылыми-әдістемелік еңбек жазған. Оның бұл еңбектері келешекке мол мұра болып қалатыны анық.
Спорттық бәсекеде аймақ бойынша барлық колледждерден 17 команда, 170-тен астам біліммен қатар спортты серік еткен мәртебелі мамандық иелері қатысып, бақ сынады.
Қатысушы командалар арасындағы ойын тартысты өтіп, турнир жеңімпаздарына Қызылорда облысының білім басқармасының Техникалық және кәсіптік білім бөлімінің басшысы Есенбаев Бекжан мен облыстық ұйымның бас маманы Жанар Сағындықова жүлделі Дипломдар мен арнайы сыйлықтар табыс етті.
