Новости территориальных организаций

«Ұстаздық – киелі мамандық» демекші, ұстаз алдынан тәрбие алмайтын жан жоқ. Ұстаз берген тәлім-тәрбие әрбір тәрбиеленушіге өмірлік жол сілтейтін шамшырақ секілді. Ғылым иесі ғалым да, ел қорғаған батыр да, тілінен бал тамған ақын да, тегеуріні темір балқытқан жұмысшы да, егін салған диқан да, мал бағып терін төккен шопан да бәрі-бәрі ұстаздан тәлім алған. Сондықтан да, ұлағатты ұстаздарға барлық адам баласы құрметпен бас иеді. Міне, сондай ұстаздық жолында өз еңбегін сарп етіп, шәкірт тәрбиелеп келе жатқан білікті ұстаз – Ақтөбе облысы, Мәртөк ауданы, №2 Мәртөк мектеп-гимназиясының мұғалімі Аймағамбетова Ермек Нурашевна. Еңбек жолын 1987 жылы бастаған. №2 Мәртөк мектеп-гимназиясында алдымен технология пәні бойынша дәріс беріп, 2013 жылдан бері биология пәнінен сабақ беріп келеді. Ол- педагогика саласына өзінің 35 жылын арнаған өз ісінің хас шебері.

Білімді, білікті әрі шығармашыл ұстаздың атқарған еңбектерін айтып жеткізу мүмкін емес. Ұстаздық жолында атқарған қызметінде жаңа технологияларды тиімді қолданып, сабақ барысында жүзеге асырып келеді. Әр күнгі сабағына үлкен ізденіспен келіп, сабақтың жүйелі әрі сапалы өтуіне үлкен мән беретінін баса айтуға болады. Ашық сабақтар мен сыныптан тыс жұмыстарын жоғары деңгейде өткізеді. Осыдан-ақ мұғалімнің ізденімпаз, жаңашыл, еңбекқор, жан-жақты екенін байқауға болады. Үздіксіз ізденістің нәтижесінде шәкірттері пәндік олимпиадаға, ғылыми жобаларға, кіші ғылым академиясына, республикалық сайыстарға қатысып, жүлделі орындарға ие болып жүр. Мәселен, оқушысы Тлеубаева Жансая ауыл оқушыларының сапалы білім алуға қолжетімділігін арттыру мақсатында ұйымдастырылатын республикалық «IQanat» олимпиадасынан биология пәні бойынша «IQanat High School of Burabay» Жоғарғы мектебінің грант иегері атанды.

Кәсіби біліктілігін арттыруда ұдайы курс-семинардан өтіп тұрады. Сондай-ақ, үздік сабақтарын баспа беттеріне жариялап, өз тәжірибесімен бөлісіп отырады. 2016 жылы «Ұстаз» газетіне «Мәдени өсімдіктердің шығу тегі мен көптүрлілігі» тақырыбында, 2018 жылы «Жорғалаушылардың басқа отрядтары» тақырыбында сабақ жоспарлары, облыс дейгейінде «Химия, биология пәндерін белсенді оқыту жолдары» атты әдістемелік құралы, «Химия мен биология әлемдеріне саяхат» тақырыбында электронды ортасы жарияланды.

Қазіргі таңда Ермек Нурашевна ұстаз ғана емес, ұл-қыз өсіріп отырған аяулы ана, бақытты әже. Мерейлі отбасы ұстаздар әулетінен құралған. «Адам ұрпағымен, ұлағатты ісімен мың жасайды» демекші, аналарының ұстаздық жолын жалғап, балалары да осы мамандықты таңдаған. Атап айтар болсақ, тұңғыш қызы Жанат Кадырова Ақтөбе мемлекеттік педагогикалық институтының шетел тілдер факультетін тәмамдап, кейін Л.Н.Гумилев атындағы Еуразия ұлттық университетінің магистратурасын аяқтаған. Қазіргі кезде Астана қаласы №32 мектеп-гимназиясында еңбек етуде. Оның жолдасы, яғни ұстаздар әулетінің күйеу баласы Самат Бодыков та педагог. Қазіргі таңда Астана қаласы №32 мектеп-гимназиясында дене шынықтыру пәнінен дәріс береді.

Әулеттің ортаншысы Уланай Жұбанова С.Бәйішев атындағы университетті аяқтап, бірнеше жыл білім ордасында қызмет атқарып, осы күні оқу орталығын ашып, балаларға қосымша дәріс беру ісімен айналысады.

Қос қызы Алтын мен Күміс те анасының жолын жалғап, ұстаз мамандығын таңдаған. Күміс Жұбанова Л.Н.Гумилев атындағы Еуразия ұлттық университетінің математика факультетін тамамдап, кейін магистратурасында білім алды. Алдымен Астана қаласындағы №38 мектеп-лицейінде еңбек етсе, қазіргі уақытта Ы.Алтынсарин атындағы BINOM мектеп-лицейінде жұмыс істейді. Ал Алтын Жұбанова С.Сейфуллин атындағы Қазақ Агротехникалық университетін азық-түлік технологиясы мамандығы бойынша аяқтағанмен, кейіннен Қ.Жұбанов атындағы Ақтөбе өңірлік университетін химия пәні бойынша, Л.Н.Гумилев атындағы Еуразия ұлттық университетінің магистратурасын тәмамдаған. Бүгінгі таңба Ы.Алтынсарин атындағы BINOM мектеп-лицейінде химия пәні мұғалімі болып қызмет етіп келеді.

«Адам ақылымен қымбатты, ұрпағымен сымбатты» демекші, осындай тәрбиелі де, саналы ұрпақ тәрбиелеп ұстаздар әулеті көпке үлгі.

Ақтөбе облыстық білім және ғылым қызметкерлері кәсіподақ ұйымының баспасөз қызметі