"ЕҢБЕК АРДАГЕРІ" – ЛАЙЫҚТЫ ЕҢБЕК АДАМЫНА
Атырау облысы, Мақат ауданы Доссор мұнай және газ технологиялық колледжісінде бастауыш кәсіподақ ұйымының ұйымдастыруымен еңбек адамын ұлықтауға арналған шара өтті. Салтанатты жиынды әсем әуенмен бастаған жүргізуішінің:
Шәкірттердің сезінумен арманын,
Ойлайтұғын білім-ғылым салмағын.
Қуанышпен құттықтаймыз бүгін біз
Басшымыздың 63-ке толғанын, – деген жалынды сөзімен басталды.
Ұжым мүшелері ұлықтаған еңбек адамы – Ізтұрған Молдабекұлы Тасбаев еді. Ол 1982 жылы Алматы қаласындағы В.И. Ленин атындағы Қазақ политехникалық институтын (қазіргі Қ.Сатпаев атындағы университет) бітіргеннен кейінгі жолы осы білім ұясында жалғасын тапты. Алғашқысында өндірістік оқыту шебері, директордың өндірістік оқыту ісі жөніндегі орынбасары, 2001 жылдан үзбестен бүгінге дейін бірінші басшы болып абыройлы қызмет атқарып келеді. Бірнеше рет Мақат аудандық мәслихатының депутаттығына сайланды. ҚР Білім және ғылым министрлігінің «ҚР Білім беру ісінің құрметті қызметкері», Ы.Алтынсарин атындағы төсбелгілерімен, ҚР Президентінің, Атырау облысы әкімінің Алғыс хаттарымен және көптеген мерекелік медальдермен марапатталған.
Салтанатты жиында сөз сөйлеген «Атырау облысы білім және ғылым қызметкерлері кәсіптік одағы» қоғамдық бірлестігінің төрағасы Қылышбай Сүндетұлы мерейтой иесінің осы колледжінің материалдық-техникалық қорын жаңаша құрудағы, аймақ өндірісіне жас мамандар дайындаудағы еңбегін айрықша атап өтті. Кезінде директор басшылық жасаған колледжі туралы республикалық салалық кәсіподақтардың басылымы «Ұстаздық еңбек» газетінде көлемді материал жазғанын да мақтан етті. Төраға сөзінің соңында құрмет иесінің омырауына Қазақстан Республикасы Оқу-ағарту министрі Ғани Бейсембаевтың қолы қойылған «Еңбек ардагері» медалін тақты.
Келесі құттықтау сөзді ардагер мұнайшы, осы колледжіде ұзақ жылдар өндірістік оқыту шебері болып қызмет атқарған Төреғали Дәулетбаев, әріптестері Талжан Жұмашева, Балғайша Ахметова, Өтеген Изимов, Жұмағыз Оразақова және Нұржамал Мұратовалар жалғастырды. Колледжі бастауыш кәсіподақ ұйымының төрағасы Баян Ташембаева ұйым атынан құттықтау ескерткіш сыйлық тарту етсе, ұжым мүшелері әннен шашу шашты.
Кездесу соңында мерейгер Ізтұрған Тасбаев құрмет көрсеткен барша ұжымдастарына өз алғысын білдірді.
«Атырау облысы білім және ғылым қызметкерлері кәсіптік одағы» қоғамдық бірлестігі, баспасөз қызметі.
