ЕҢБЕК АДАМЫН ҰЛЫҚТАУ
Шығыс Қазақстан облысы Күршім ауданы Боран ауылындағы атынан ат үркетін Құмаш Нұрғалиев атындағы гимназиясының жалпы 1000 жылды құрайтын педагогикалық әулеттің өкілі, білім саласының ірі тұлғасы - Нұрғалиев Талант Құмашұлы туралы сөз қозғағымыз келіп отыр.
Аты аңызға айналған КСРО Халық Мұғалімі Құмаш Нұрғалиевтің ұлы Талант Құмашұлы 1973 жылы Өскемен педагогика институтының физика-математика факультетін бітірген. 1973-1983 жылдары Боран ауылындағы мектепте физика пәнінің мұғалімі, кейіннен 1983-1986 жылдар аралығында Алматы қаласындағы Ы.Алтынсарин атындағы ғылыми-зерттеу институты аспирантурасының іштей бөлімінде оқыды. 1989 жылы Шығыс Қазақстан облысы Марқакөл ауданының Ленин атындағы Боран орта мектебіне директор болып тағайындалды.1992 жылы мектепке Халық Мұғалімі Құмаш Нұрғалиевтің аты берілді.
1973 жылдан бастап мектепте кабинеттік жүйе және техникалық-телевизиялық орталық құрумен айналысты. Осы уақытта бірнеше мектеп техникалық-телевизиялық орталығының модельдері ұсынылып, іске қосылып жатты. Кино-фоно-фото-видеотека негізінде құрылған техникалық-телевизиялық орталығы ақпараттық білім берудің бірден бір жолы, оқу-тәрбие үрдісінде экранды-дыбыстық, оқу бейне жазбалары және оқытудың басқа да жолдарымен қамтамасыз етілді.
Білім беруді ақпараттандыру, білім сапасын арттырудағы заманауи ақпараттық технологияларды қолдану, қашықтықтан оқыту, ауыл мектебі моделін құру және іске асыру бағытында зерттеулер жүргізіп, бірнеше жыл бойы бейімдік ауыл мектебі авторлық моделін құрумен айналысты.
Педагогикалық ұжымның мол тәжірибесі, оқу үрдісіндегі оқытудың жаңа технологияларын қолдану және мектеп директоры Т.К Нұрғалиевтің жаңашылдығы педагогикалық қоғамның жоғары бағасын алды. Мектепте сапалы білім, саналы тәрбие беру жолында әрбір оқу жылына нақты міндеттер қойылып, айқынды жұмыстар атқарылды. Соның арқасында жоғары көрсеткіштерге қол жеткізілді: Шығыс Қазақстан облысы әкімінің «Үздік ауыл мектебі» аталымының иегері; гимназия үздік сандық білім ресурстары үшін республикалық кезеңде жүлделі 1-орын ие болды; гимназияның бірқатар үздік ұстаздары мен дарынды шәкірттерінің есімдері «Лучшие люди Казахстана» сериясымен шыққан «Қазақстанның дарынды шәкірттері» атты республикалық энциклопедияға енді; аудандық мектеп мұғалімдерінің дәстүрлі шығармашылық есеп беру кешінің сайысында Құмаш Нұрғалиев атындағы гимназия аудан көлемінде бас жүлде иеленді; облыстық «Білім беру мекемелерінің үздік ауласы-2015» байқауының «Ауылдық мектептің үздік мектеп ауласы» аталымының Бас жүлдесімен марапатталды және т.б.
Талант Құмашұлы менеджер, педагогика ғылымдарының кандидаты, Ұлттық ғылым академиясының корреспондент-мүшесі, ҚР білім беру ісінің құрметті қызметкері, КСРО білім беру ісінің үздігі, Ы.Алтынсарин медалінің және «Парасат» орденінің иегері, Күршім ауданының Құрметті азаматы, 2023 жылы ШҚО жергілікті кәсіподақ тарапынан ұсынып «Еңбек ардагері» медалінің иегері.
Талант Құмашұлын мәртебелі марапатпен шың жүректен құттықтап деніңізге саулық, отбасыңызға береке-бірлік, ұзақ ғұмыр тілейміз!
