ЕҢБЕК АДАМЫ
Еліміздегі ертеңгі тізгін ұстар, Отанын ғаламдық дамудың көшінен қалдырмай өрге шығарар азамат тәрбиелеу ұстаздарға жүктелген аса маңызды да жауапты міндет. «Ұстаз» деген сөз біз үшін қашанда қадірлі, қасиетті саналады. Небір данышпан да, қарапайым еңбек адамы да осы ұстаз алдынан өтеді. Ал, ұстаз болу кез-келген адамның қолынан келе бермейтін іс. Сондықтан, осы құрметті атаққа кір келтірмей, бар саналы ғұмырын жас ұрпаққа білім мен тәрбие беруге аямай жұмсаған ұлағатты ұстаздар арамызда аз емес. Сондай жандардың бірі, осы салада қырық жылға жуық абыройлы еңбек етіп келе жатқан Жиенаева Балсұлу Панақызын аудан жұртшылығы тәжірибелі ұстаз, білікті маман ретінде жақсы таниды.
Жиенаева Балсұлу Панақызы 1963 жылы 7 қазанда Ақтөбе облысы Темір ауданы Кеңқияқ поселкесінде дүниеге келген. 1970-1978 жылдар аралығында Бәшенкөл негізгі орта мектебінде білім алып, Ақтөбе педагогикалық училищесінің бастауыш класс мұғалімдерін даярлайтын бөліміне оқуға қабылданады. Аталған оқу орнын 1982 жылы бітіреді. Ағашқы еңбек жолын туған жерінде бастауыш класс мұғалімі болып бастайды. 1983 жылы Алматыдағы ҚазПИ-дің филологиялық факультетіне оқуға түсіп, 1988 жылы аяқтап шығады. Қазіргі таңда Кеңқияқ орта мектебінде қазақ тілі мен әдебиеті пәнінің мұғалімі болып қызмет етіп келеді.
Оның еңбек жолында жеткен жетістері аз емес. Шәкірттерін де аудандық, облыстық, республикалық байқауларға қатыстырып, талай бәйге алып жүр. Атап айтсақ: өскелелең ұрпақты оқытумен тәрбиелеудегі қол жеткізген табыстары үшін Алғыс хаттар мен ұзақ жылғы ұстаздық еңбегі үшін Қазақстандық оқу-ағарту, ғылым және жоғары білім қызметкерлерінің салалық кәсіподағының Күміс медалімен марапатталды.
Ұстаз үшін берілген білімнің қаншалықты баланың санасына жетіп, көкейінде қалуы маңызды. Болашақта өзі еккен ағашының біртіндеп бүршік атып, жемісін беруі – әрбір ұстаздың қуанышы мен арманы. Ұлы жолдың бойымен келе жатқан ұлы ұстаздарымызды ұлықтау – тұтас елдің парызы.
Алаш көсемі Әлихан Бөкейханның сөзінше, ұлтқа қызмет ету мінезден. Бұл – Балсұлу Панақызына қарата айтылған. Себебі оның әріптестері мен шәкірттері мінезді мұғалім ретінде бағалайды. Ұлағатты ұстаздың ел болашағын тәрбиелеуде тынымсыз күндер мен түндерді артқа тастап, абырой биігінде келеді. Оның жеткен жетістігі, шыққан асуынан гөрі әлі қоғамға берері мол. Сондықтан, білім сапасының артуына өз үлесін қосып, талай жыл талмай-қажымай еңбек етіп келе жатқан еңбек адамының биік тұғырынан түспей, әлі де біраз белесті бағындыра беретініне сеніміміз мол.
