ЕҢБЕК ДЕМАЛЫСЫ КЕЗІНДЕ МҰҒАЛІМДЕРДІ МЕКТЕП АУЛАСЫН КӨГАЛДАНДЫРУ ЖҰМЫСТАРЫНА ТАРТУ ЗАҢДЫ МА?
Мұғалімдерді еңбек демалысы кезеңінде, нақтырақ айтқанда маусым, шілде айларында бір аптаға мектеп ауласындағы көгалдандыру (жасыл аймақты күтіп баптау) жұмыстарына қатысуға міндеттеп, кезекшілікке жазып қояды. Еңбек демалысы кезінде осындай жұмыстарға тарту заңды ма?
ҚР Еңбек кодексінің (әрі қарай - ҚР ЕК) 87-бабы 2-тармағына сәйкес жыл сайынғы ақы төленетін еңбек демалысы жұмыскердің тынығуына, жұмысқа қабілеттілігін қалпына келтіруіне, денсаулығын нығайтуына және жұмыскердің өзге де жеке қажеттіліктеріне арналады және жұмыс орны (лауазымы) мен орташа жалақысы сақтала отырып, белгілі бір күнтізбелік күндер санына беріледі.
Жыл сайынғы ақы төленетін негізгі еңбек демалысы "Ең төмен әлеуметтік стандарттар және олардың кепілдіктері туралы" ҚР Заңына сәйкес еңбек саласындағы ең төмен әлеуметтік стандарттар болып табылады.
Еңбек заңнамаларымен белгіленген, ақылы еңбек демалысын жұмыс беруші жұмыскердің жазбаша келісімімен ҚР ЕК 95-бабында белгіленген тәртіппен кері шақыртып алу арқылы ғана тоқтата алады.
Жұмыс беруші педагогтарды, еңбек демалысы кезеңінде, жұмыстан тыс уақытта кезекшілік етуге міндеттеуге құқы жоқ.
"Педагог мәртебесі туралы" заңның 6 - бабы 2-тармағының 1) тармақшасына сәйкес ҚР заңдарында көзделген жағдайларды қоспағанда, оны кәсіптік міндеттерімен байланысты емес жұмыс түрлеріне тартуға жол берілмейтіні нақты көрсетілген.
Білім беруді ұйымдастыру жөніндегі педагогтардың кезекшілік кестесі Ішкі еңбек
тәртіптемесінің ережелерімен белгіленуі тиіс.
Әлеуметтік әріптестік туралы Салалық келісімнің 6.11. - тармағына сәйкес сабақтар арасында көзделген қысқа үзілістер жұмыс уақыты болғандықтан, жұмыс беруші бекітілген кестеге сәйкес кезекшілікті ұйымдастыруға құқылы.
Мұғалімдердің кезекшілігі сабақ басталғанға дейін 20 минут бұрын басталуы керек және ол аяқталғаннан кейін 20 минуттан аспауы керек.
Педагогты өзінің кәсіби міндеттеріне жатпайтын жұмыстарға (оның ішінде аула тазалау, көгалдандыру т.б.) тартқаны үшін кінәлі тұлғаларға ҚР Әкімшілік құқық бұзушылық туралы кодексінің 409-бабы 7-3 және 7-4-тармақтары бойынша жаза қолданылады.
Аталған заң бұзушылықтар орын алған жағдайда педагогтар өз өңіріндегі Білім саласында сапаны қамтамасыз ету департаментіне немесе Еңбек инспекциясына арыздануға құқылы.