ЕҢБЕК АДАМЫ
Ұстаздың еңбегі – ұлттың келешегіне салынған инвестиция. Саналы ұрпақ тәрбиелеп, білім мен тәрбиені қатар ұштастырған жанның еңбегі әрдайым құрметке лайық. Осындай өмірін ұстаздық жолға арнап, шәкірт тәрбиелеуді басты мұраты еткен еңбек адамдарының бірі – Қызылорда облысы, Арал ауданы, №73 орта мектебінің физика пәнінің мұғалімі, директордың тәрбие ісі жөніндегі орынбасары Бекжанова Орынгүл Жандосқызы.
Орынгүл Жандосқызы 1966 жылдың 12 қаңтарында Қызылорда облысы, Арал ауданы, Қамыстыбас ауылында дүниеге келген. 1989 жылы А.С. Пушкин атындағы Орал педагогикалық институтын тәмамдап, ұстаздық еңбек жолын бастады. Содан бері білім саласында үздіксіз еңбек етіп, жас ұрпақтың сапалы білім мен саналы тәрбие алуына өлшеусіз үлес қосып келеді.
37 жылдық педагогикалық еңбек өтілінің 25 жылын тәрбие жұмысына арнаған тәжірибелі ұстаз мектептің тәрбие жүйесін жетілдіруге, ұлттық және адамгершілік құндылықтарды насихаттауға, жас ұрпақтың бойында жауапкершілік пен отансүйгіштік қасиеттерді қалыптастыруға аянбай еңбек етіп келеді. Әсіресе, еңбек жолын жаңадан бастаған жас мұғалімдерге бағыт-бағдар беріп, тәжірибесімен бөлісуі оның кәсіби тұлғасын айқындай түседі.
Ұстаз үшін ең үлкен жетістік – шәкіртінің табысы. Орынгүл Жандосқызы тәрбиелеген түлектер бүгінде еліміздің әр өңірінде түрлі салада абыройлы қызмет атқарып, қоғамның дамуына өз үлестерін қосуда. Бұл – ұстаздың жылдар бойғы табанды еңбегі мен тынымсыз ізденісінің жемісі.
Көп жылғы адал еңбегімен ұжымның құрметіне бөленген Орынгүл Жандосқызы – білікті педагог қана емес, жас әріптестеріне тәлімгер, оқушыларына жанашыр ұстаз. Оның кәсібіне деген сүйіспеншілігі, жауапкершілігі мен еңбекқорлығы кейінгі буынға үлгі болып келеді.
Ұстаздық жол – төзім мен табандылықты, білім мен парасатты талап ететін қасиетті жол. Осы жолда маңдай терін төгіп, ел болашағы үшін аянбай еңбек етіп жүрген Орынгүл Жандосқызының ғибратты ғұмыры – «Еңбек адамы» атағына әбден лайық өнегелі өмір жолы.
Қызылорда облыстық ұйымы
