Новости территориальных организаций

Ермекқалиев Айбар Өтемұратұлы — Алматы қаласындағы №136 мектептің тарих пәнінің мұғалімі, «Ұстаз» кәсіподағының мүшесі, STORIA AI көпфункционалды білім беру платформасының негізін қалаушы. «Алматы ұстазы» байқауының жеңімпазы. Оның педагогикалық қызметінде ғылыми ізденіс, оқушының дербес ойлауын дамыту және білім берудегі жаңа мүмкіндіктерді қолдану өзара сабақтасып келеді.

Айбардың педагогикаға бет бұруына тарихқа деген қызығушылығы мен білімін жас ұрпақпен бөлісуге ұмтылысы негіз болды. Тарих пен құқық саласында алған білімі кәсіби дүниетанымының қалыптасуына ықпал етті. Абай атындағы Қазақ ұлттық педагогикалық университетіндегі докторантурада ғылыми ізденісін жалғастырып, тарихи зерттеулерді оқыту тәжірибесімен ұштастыруға ден қойды.

Оның еңбек жолы мектеп, колледж және университеттегі қызметті қамтиды. Әртүрлі жастағы білім алушылармен жұмыс істеу педагогикалық тәжірибесін байытып, оқытуды шәкірттің қажеттілігі мен мүмкіндігіне қарай ұйымдастыруға үйретті. Мектепте оқушының қызығушылығы мен қабілетін ашуға көңіл бөлсе, колледжде білімнің практикалық қолданысына, университетте ғылыми талдау мен дербес ізденіске басымдық берді.

«Шәкірттің жүрегіне сенім, ойына еркіндік, ізденісіне бағыт беру» — ұстаздың негізгі педагогикалық ұстанымы. Ол сабақта оқушылардың сұрақ қоюына, деректерді салыстыруына және өз пікірін дәлелдеуіне жағдай жасайды. Оның түсінігінде білімнің нәтижесі оқушының алған ақпаратын түсініп, жаңа жағдайда қолдана білуінен көрінеді. Сондықтан зерттеушілік тапсырмалар, сыни ойлау мен функционалдық сауаттылықты дамыту жұмыстары тәжірибесінде маңызды орын алады.

Осы ізденістердің нәтижесінде Айбар Ермекқалиев STORIA AI көпфункционалды білім беру платформасының негізін қалады. Қазақстан және дүниежүзі тарихын меңгеруге арналған платформа тарихи карталарды, уақыт сызығын, жасанды интеллект көмегін, тесттер мен зерттеу тапсырмаларын біріктіреді. «Оқиғадан – үдеріске, фактіден – тағылымға» идеясына сүйенген жоба оқушыны тарихи оқиғалардың себеп-салдарын түсінуге, деректерді тексеруге және дәлелді қорытынды жасауға бағыттайды.

Ұстаздың кәсіби жолындағы елеулі жетістіктерінің бірі — «Алматы ұстазы» байқауындағы жеңісі. Ол байқаудың үш кезеңінен өтті. Алғашқы кезеңде тест арқылы кәсіби білімін танытса, екінші кезеңде ашық сабақ өткізіп, оқыту әдістерін тәжірибеде көрсетті. Үшінші кезеңде «Мен — көшбасшы мұғаліммін» тақырыбында авторлық жобасын қорғады. Бұл сындар оның пәндік білімін, педагогикалық шеберлігін және идеяны нақты іске айналдыру қабілетін көрсетуге мүмкіндік берді.

Айбар Ермекқалиевтің өзі де, шәкірттері де түрлі олимпиадаларда, ғылыми жобаларда, интеллектуалдық сайыстар мен конкурстарда жеңімпаз атанып келеді. Бұл жетістіктердің негізінде жүйелі дайындық, бірлескен ізденіс және мұғалім мен оқушы арасындағы сенім жатыр. Ұстаз үшін шәкіртінің өз ойын еркін жеткізіп, зерттеуін соңына дейін жеткізе алуы да маңызды нәтиже саналады.

«Алматы ұстазы» байқауындағы жеңіс оның кәсіби дамуына жаңа серпін берді. Алдағы мақсаты — жинақтаған тәжірибесін әріптестерімен бөлісу, STORIA AI платформасын жетілдіру және оқушылардың ізденіс мүмкіндігін кеңейту. Оның ұстаздық жолы білімді, дербес ойлайтын, жауапкершілігі жоғары ұрпақ тәрбиелеуге бағытталған.