ХАЛЫҚАРАЛЫҚ ЫНТЫМАҚТАСТЫҚТЫҢ КӨКЖИЕГІ КЕҢЕЮДЕ
8-9 ақпан күндері Халықаралық еңбек ұйымының (әрі қарай – ХЕҰ) шақыруымен Қазақстандық оқу- ағарту, ғылым және жоғары білім қызметкерлері салалық кәсіподағының делегациясы ХЕҰ ұйымдастырған семинарға қатысты. Қазақстандық делегацияны ХЕҰ жұмысшыларының қызметі бойынша Еуропа және Орталық Азия секторының меңгерушісі Сергиус Гловацкас ХЕҰ Бас кеңсесімен таныстырды.
Семинардың ашылу салтанатында Сергиус Гловацкас ХЕҰ құрылу тарихы, миссиясы мен рөлі туралы айтып өтті. 1919 жылы құрылған ХЕҰ Біріккен Ұлттар ұйымының (БҰҰ) еңбек саласындағы мамандандырылған мекемесі болып табылады. Қазіргі уақытта 187 мемлекет мүше ХЕҰ 2019 жылы өзінің 100 жылдығын атап өтті.
Семинар барысында Айгүл Мұқашева бастаған делегация Халықаралық ұйымның жетекші мамандары мен бөлім басшыларының (Э.Жульен, В.Рикко, Р.Пэлс) еңбек қатынастары, жалақы мәселелері тақырыптарындағы дәрістерін тыңдап, пікір алмасты. Делегация үшін тағы бір маңызды кездесу: ХЕҰ-ACTRAV директоры Мария Хелена Андремен өтті, керемет пікір алмасу болды. М.-Х. Андре елімізде еңбек қатынастары саласындағы болып жатқан өзгерістеге және Кәсіподақтар федерациясының жұмысына оң баға берді.
Қазақстан Республикасы Кәсіподақтар федерациясы ХЕҰ конвенцияларын ратификациялау және әлеуметтік-еңбек саласына халықаралық стандарттарды енгізу мәселесі бойынша мақсатты жұмыс жүргізуде. Қазіргі уақытта Қазақстанда ХЕҰ-ның 25 конвенциясы ратификацияланды.
Салалық кәсіподақ делегациясы атынан Айгүл Мұқашева Сергиус Гловацкасқа жылы қабылдау үшін алғысын білдіріп, ҚРКФ құрамында ХЕҰ- мен сындарлы ынтымақтастықты жалғастыруға дайын екенін жеткізді.
Салалық кәсіподақ қызметі ХЕҰ тарапынан жоғары бағаланып, Құрмет грамотасымен марапатталды.
-
Фото
-
