МҰҒАЛІМДЕРДІ КЕЗЕКШІЛІККЕ ҚОЮДЫҢ БЕЛГІЛЕНГЕН ТӘРТІБІ БАР МА? ЖҰМЫС УАҚЫТЫНАН ТЫС МЕЗГІЛДЕ КЕЗЕКШІЛІККЕ ТҰРУҒА МІНДЕТТЕУГЕ ЖҰМЫС БЕРУШІНІҢ ҚАНШАЛЫҚТЫ ҚҰҚЫҒЫ БАР?
Жұмыс уақытынан тыс мезгілде мұғалімдерді кезекшілікке тұруға міндеттеуге жұмыс берушінің құқығы жоқ. ҚР «Педагог мәртебесі туралы» заңының 6-бабы 2-тармағы 1)-тармағында - педагогты оның кәсіби міндеттеріне байланысты емес жұмыс түрлеріне тартуға жол берілмейтіндігі туралы нақты көрсетілген. Сонымен қатар, осы баптың 2-тармағының талаптарын бұзу Қазақстан Республикасының заңдарында белгіленген жауаптылыққа әкелетіндігі көзделген.
Кәсіби міндеттеріне қатысы жоқ жұмыс түрлеріне тарту мәжбүрлі еңбек болып саналады.
ҚР Конституция бойынша мәжбүрлі еңбекке тыйым салынған. ҚР Конституциясының 24-бабы 1-тармағына сәйкес «Әркімнің еңбек ету бостандығына, қызмет пен кәсіп түрін еркін таңдауына құқығы бар. Еріксіз еңбекке соттың үкімі бойынша не төтенше жағдайда немесе соғыс жағдайында ғана жол беріледі».
Сондықтан да, жұмыс берушінің түрлі кезекшіліктерге немесе басқа да кәсіби міндеттеріне байланысты емес жұмыс түрлеріне педагогтарды тартуға кұқығы жоқ.
МҰҒАЛІМДЕР МЕН ЖҰМЫС БЕРУШІЛЕР БІЛУІ МАҢЫЗДЫ! Сабақтар арасында берілетін қысқаша үзілістер жұмыс уақыты болып табылатындықтан, жұмыс берушінің бекітілген кестеге сәйкес мұғалімдердің кезекшілігін ұйымдастыруға құқығы бар. Мұғалімдердің кезекшілігі сабақ басталардан 20 минут бұрын басталуы керек және ол аяқталғаннан кейін 20 минуттан аспауы тиіс.