Мемлекеттік білім беру ұйымдарының бірінші басшылары мен педагогтарын лауазымға тағайындау, лауазымнан босатудың жаңа Қағидаларындағы кейбір нормалар туралы
ҚР Оқу-ағарту министрінің 2025 жылғы 31 наурыздағы № 57 және ҚР Еңбек және халықты әлеуметтік қорғау министрінің 2025 жылғы 31 наурыздағы № 96 бірлескен бұйрығымен бұрын қолданыста болған Мемлекеттік білім беру ұйымдарының бірінші басшылары мен педагогтарын қызметке тағайындау, лауазымнан босату Қағидаларының күші жойылды.
Осы бұйрықпен 2025 жылғы 11 сәуірде, яғни ресми жарияланған күнінен бастап он күн өткен соң қолданысқа енгізілген Мемлекеттік білім беру ұйымдарының бірінші басшылары мен педагогтарын лауазымға тағайындау, лауазымнан босатудың жаңа қағидалары (бұдан әрі – Қағидалар) бекітілді.
Күші жойылған Қағидалардың 178-тармағына сәйкес білім беру ұйымы қоса атқаратын педагогтарды «Педагог мәртебесі туралы» ҚР Заңына сәйкес педагогтар үшін айқындалған нормативтік оқу жүктемесінің 50%-дан аспайтын есебімен және еңбек заңнамасы шеңберінде жұмыс уақытының қалыпты ұзақтығының 50%-дан аспайтын режимінде жұмыс істейтін қоса атқаратын педагогтарды жұмысқа қабылдауға құқылы. Осы ретте, конкурстық рәсімдердің өткізілуі де міндетті болды.
Жаңа Қағидалардың 134-тармағына сәйкес білім беру ұйымы қоса атқарушыларды ҚР Еңбек кодексінің (бұдан әрі – Кодекс) 32-бабы 4-тармағында айқындалған тәртіппен негізгі жұмыс берушінің келісімі бойынша конкурссыз жұмысқа қабылдайды.
Осылайша, уәкілетті орган негізгі және қосымша жұмыс орны бойынша жұмыс уақытының жиынтық ұзақтығы бойынша шектеулер сақталған жағдайда қоса атқарушыларды жұмысқа қабылдау тәртібін жеңілдетті.
Яғни, қоса атқарылатын жұмыс күнделікті жұмыс ұзақтығының нормасынан 4 сағаттан аспауы тиіс. Демек, тәулігіне 12 сағат/аптасына 60 сағат, өйткені күнделікті жұмыстың ұзақтығы 8 сағатты құрайды (Кодекстің 71-бабының 4-тармағы).
Жаңа Қағидаларда білім берудегі өзгерістер көшбасшыларын іріктеу және даярлау және оларды тағайындау тәртібін айқындайтын ережелер алынып тасталды. Яғни, жаңа Қағидаларда республикалық кадр резервіне кандидаттарды іріктеуді, іріктеу кезеңдерін, даярлауды регламенттейтін нормалар жоқ.
Сонымен қатар, қолданысқа енгізілген Қағидаларда Республикалық кадр резервіне алынған басшының орынбасарларын, педагогтарды мемлекеттік білім беру ұйымының басшысы, басшысының орынбасары лауазымына конкурстық рәсімдерден өтпей тағайындау нормалары қарастырылған.
Фото