«Зияткер» мамандандырылған мектеп-лицей-интернаты» КММ мұғалімдеріне магистр дәрежесі үшін қосымша ақы төлеу туралы
«Азаматтық қызметшілерге, мемлекеттік бюджет қаражаты есебінен ұсталатын ұйымдардың қызметкерлеріне, қазыналық кәсіпорындардың қызметкерлеріне еңбекақы төлеу жүйесі» ҚР Үкіметінің 2015 жылғы 31 желтоқсандағы №1193 Қаулысымен (бұдан әрі-Қаулы) бекітілген.
Жоғарыда көрсетілген Қаулының 4-Қосымшасының 10-тармағына сәйкес бастауыш, негізгі орта, жалпы орта білім беру ұйымдарының мұғалімдеріне, әдістемелік кабинет (орталық) педагогтеріне ғылыми-педагогикалық бағыт бойынша магистр дәрежесі үшін 10 АЕК көлемінде қосымша ақы көзделген.
Көрсетілген қосымша ақы тиісті дипломы болған жағдайда және негізгі жұмыс орны бойынша нақты жүктемеге қарамастан белгіленеді.
«Білім беру ұйымдары түрлерінің номенклатурасын бекіту туралы» Қазақстан Республикасы Білім және ғылым министрінің 2013 жылғы 22 ақпандағы № 50 Бұйрығының 2-тармағы 7)-тармақшасына сәйкес мамандандырылған мектеп-лицей-интернаты орта білім беру ұйымдары (бастауыш, негізгі орта, жалпы орта), оның ішінде мамандандырылған және арнайы білім беру ұйымдары қатарына жатады.
Осыған қоса, ҚР «Білім туралы» Заңының (әрі қарай - Заң) 1-бабы 49)-тармақшасы негізінде орта білім - азаматтардың Қазақстан Республикасының Конституциясымен кепілдік берілген, білім берудің мемлекеттік жалпыға міндетті стандарттарына сәйкес бастауыш, негізгі орта және жалпы орта білім берудің жалпы білім беретін оқу бағдарламаларын меңгеруі нәтижесінде алатын білімі.
Заңның 1-бабы 49-2) тармақшасына сәйкес орта білім беру ұйымы – мектепке дейінгі тәрбие беру мен оқытудың, бастауыш, негiзгi орта, жалпы орта бiлiмнің жалпы бiлiм беретін оқу бағдарламаларын, мамандандырылған жалпы білім беретін және арнайы оқу бағдарламаларын iске асыратын бiлiм беру ұйымы болып табылады.
Сондықтан, «Зияткер» мамандандырылған мектеп-лицей-интернаты» коммуналдық мемлекеттік мекемесі мемлекеттік жалпыға міндетті стандарттарына сәйкес бастауыш, негізгі орта, жалпы орта беруді жүзеге асыратын ұйымдар қатарына жататындықтан ғылыми-педагогикалық бағыт бойынша магистр дәрежесі үшін 10 АЕК көлемінде қосымша ақы мамандандырылған мектеп-лицей-интернаты ұйымдарының мұғалімдеріне белгіленеді.