Жұмыстан босатылуына байланысты жұмыс берушінің пайдаланылмаған демалыс үшін өтемақыны төлеген кезде жеке табыс салығы мен басқа да әлеуметтік аударымдар ұсталынады ма?
ҚР Еңбек кодексінің 96-бабы 2-тармағына сәйкес еңбек шарты тоқтатылған кезде жыл сайынғы ақы төленетін еңбек демалысын пайдаланбаған немесе толық пайдаланбаған жұмыскерге жыл сайынғы ақы төленетін еңбек демалысының пайдаланылмаған күндері үшін өтемақы төлемі жүргізіледі.
Осылайша, қызметкер жұмыстан босатылған кезде, егер ол еңбек демалысында болмаған немесе жұмыстан босату күніне дейін кезекті демалыстан кейінгі жұмыс кезеңінде демалыс күндері «жинақталған» болса, қызметкерге осы күндер үшін ақшалай өтемақы төленеді.
ҚР Салық кодексінің 322-бабы 1-тармағы 1)- тармақшасына сәйкес еңбек қатынастарының болуына байланысты жұмыс беруші жұмыскердің меншігіне беруге жататын, қолма-қол және (немесе) қолма-қол емес нысандарындағы ақша жұмыскердің салық салуға жататын кірістері болып табылады.
Осылайша, пайдаланылмаған демалыс үшін өтемақы қызметкердің салық салынатын табысы болып табылады және 10 % стандартты ставка бойынша жеке табыс салығы (бұдан әрі –ЖТС) салынады (ҚР Салық қодексінің 320-бабы 1-тармағы).
ҚР Әлеуметтік кодексінің 248-бабы 8-тармағына сәйкес міндетті зейнетақы жарналарын (бұдан әрі –МЗЖ), жұмыс берушінің міндетті зейнетақы жарналарын есептеуге арналған кіріске еңбекке ақы төлеудің ақшалай түрдегі барлық түрлері және өзге де кірістер енгізіледі.
Демек, есептелген өтемақы сомасынан 10% МЗЖ ұсталынады (ҚР Әлеуметтік кодексінің 249-бабы 1-тармағы 1)-тармақшасы).
ҚР Міндетті әлеуметтік медициналық сақтандыру туралы заңының 29-бабы 1-тармағымен, көрсетілген баптың 4-тармағында белгіленген кірістерді қоспағанда, жұмыс берушілер есепке жазған кірістер жұмыскерлердің, оның ішінде мемлекеттік және азаматтық қызметшілердің аударымдар мен жарналарды есептеу үшін қабылданатын кірістері болып табылады.
Осылайша, өтемақы төлемінен міндетті әлеуметтік медициналық сақтандыруға (бұдан әрі-МӘМС) белгіленген нысанда ұсталады (ҚР Міндетті әлеуметтік медициналық сақтандыру туралы заңының 27 бабы).
Жоғарыда айтылғандарға сүйене отырып, пайдаланылмаған демалыс үшін өтемақыға жалақыға ұқсас салықтар мен әлеуметтік аударымдар ұсталынады. Бұл сомаға қатысты ешқандай жеңілдіктер қарастырылмаған.