Магистр дәрежесі үшін қосымға ақы төлеуге қатысты
Ғылыми-педагогикалық бағыттағы белгілі бір мамандық бойынша магистр дипломы бар, бірақ атқаратын мұғалімдік лауазымына сәйкес келмейтін ұстаздарға магистр дәрежесі үшін қосымша ақы төлеуге қатысты.
ҚР «Педагог мәртебесі туралы» Заңының 8-бабы 5-тармағына сәйкес мемлекеттік орта білім беру ұйымында, сондай-ақ әдістемелік кабинетте кәсіптік қызметін жүзеге асыратын педагогке негізгі жұмыс орны бойынша ғылыми-педагогикалық бағыт бойынша магистр дәрежесі үшін республикалық бюджет туралы заңда белгіленген және тиісті қаржы жылының 1 қаңтарына қолданыста болатын айлық есептік көрсеткіштің 10 еселенген мөлшерінде қосымша ақы белгіленеді.
Білім және ғылым министрінің 2020 жылғы 11 мамырдағы № 191 бұйрығымен бекітілген «Мемлекеттік ұйымдар Педагогтарінің жалақысын есептеу қағидаларының» (бұдан әрі –Қағидалар) 39-тармағы 1) және 2) тармақшаларға сәйкес жоғары оқу орнынан кейінгі білім берудің мемлекеттік жалпыға міндетті білім беру стандартына сәйкес оқу мерзімі екі жылдан кем емес ғылыми-педагогикалық бағытта және (немесе) ғылыми-педагогикалық бағыттағы білім беру бағдарламалары бойынша ECTS 120 академиялық кредиттен кем емес меңгерген магистр дәрежесі үшін, сондай-ақ Қазақстан Республикасы жоғары және жоғары оқу орнынан кейінгі мамандықтар жіктеуішіне сәйкес Қағидаларда көрсетілген даярлау бағыттарына баламалы мамандықтары бойынша, сондай-ақ бейінді магистратураны аяқтаған магистрге педагогикалық бейіндегі магистратураның бағдарламасын қосымша меңгеруден кейін белгіленген үлгідегі құжаттардың негізінде нақты оқу жүктемесіне қарамастан негізгі жұмыс орны бойынша қосымша ақы жүргізіледі.
Жоғарыда келтірілгендерге сүйене отырып, магистр дәрежесі үшін қосымша ақы белгілеу үшін мұғалімнің мамандығы бойынша атқаратын лауазымы мен магистрлік дипломда көрсетілген мамандықтың сәйкес болуы міндетті шарт болып табылмайды.
Сондықтан, егер ғылыми-педагогикалық бағыттағы білім беру бағдарламалары бойынша тиісті магистр дипломы немесе жоғарыда аталған Қағидаларда көрсетілген дайындық бағыттарына баламалы мамандықтар бойынша магистр дипломы бар немесе бейіндік магистратураны бітірген магистр педагогикалық бейіндегі магистратураның білім беру бағдарламасын қосымша меңгергеннен кейін, мұғалімге көрсетілген қосымша ақы жүргізіледі.