Скринингтік зерттеулерден өту кезінде жұмыс беруші жұмыскерді жұмыстан босатуға міндетті ме?
Халық денсаулығы және денсаулық сақтау жүйесі туралы ҚР Кодексінің (бұдан әрі –Кодекс) 80-бабы 3) тармақшасына сәйкес ҚР азаматтары профилактикалық медициналық қарап-тексерулерден, скринингтік зерттеулерден өтуге міндетті.
Кодекстің 87-бабы 1 және 4 тармақтарымен скринингтік зерттеулер халықтың нысаналы топтары арасында ауруларды ерте сатыларда анықтау және аурулар дамуының, аурулардың пайда болуына ықпал ететін тәуекел факторларының алдын алу, халықтың денсаулығын қалыптастыру және нығайту мақсатында жүргізіледі делінген.
Жұмыс берушілер осы қарап-тексерулерге жататын адамдарға тегін медициналық көмектің кепілдік берілген көлемі шеңберінде және (немесе) міндетті әлеуметтік медициналық сақтандыру жүйесінде скринингтік зерттеулерден өту үшін жағдайлар жасайды, сондай-ақ жұмыскерлерді олардан өту үшін жұмыс уақыты кезеңінде Қазақстан Республикасының еңбек заңнамасына сәйкес жұмыс орнын (лауазымын), орташа жалақысын сақтай отырып, кедергісіз босатады.
Осыған орай, ҚР Еңбек кодексінің 23-бабы 26-1) – тармақшасымен жұмыс берушінің негізгі міндеттерінің бірі болып жұмыскерге Қазақстан Республикасының денсаулық сақтау саласындағы заңнамасында айқындалған тәртіппен және көлемде жұмыс орны (лауазымы) мен орташа жалақысын сақтай отырып, скринингтік зерттеулерден өту үшін демалыс беру көрсетілген.
Сондай-ақ, ҚР Еңбек кодексінің 87-бабы 4 тармағына сәйкес скринингтік зерттеулерден өту кезеңі әлеуметтік демалыстың бір түрі деп танылған.
Бұл ретте, ҚР Еңбек кодексінің 87-бабы 5 тармағы 5) тармақшасына сәйкес бір жыл ішінде үш жұмыс күнінен аспайтын көлемде скринингтік зерттеулерден өтуге арналған әлеуметтік демалыс беріледі.
Осылайша, жұмыскер скринингтік зерттеулерден өткен кезде жұмыс орнын (лауазымын) және орташа жалақысын сақтай отырып, бір жыл ішінде үш жұмыс күнінен аспайтын жұмыстан босатылады.