Жаңалықтар

13-14 желтоқсанда Қазақстандық салалық білім және ғылым қызметкерлері кәсіподағының төрайымы А.М.Мұқашева Болгария ұстаздары кәсіподағының шақыртуы бойынша жұмыс сапарымен Болгария Республикасының София қаласында болды.
Салалық кәсіподақ төрайымы Болгарияның ұстаздар кәсіподағының әлеуметтік әріптестері мен бастауыш кәсіподақ ұйымдарының төрағаларыұйымдастырған «Білім – өскелең ұрпақ бойында азаматтық қасиеттер мен моральдық құндылықтарды қалыптастырудың факторы» тақырыбындағы форумға қатысты.
Форум жұмысын Болгарияның ұстаздар кәсіподағының төрайымы Янка Такаева ашты. Бұдан соң жиналғандарды форумның ашылуымен Болгарияның білім министрі Красимир Вылчев пен елдегі Тәуелсіз кәсіподақтар конфедерациясының президенті Пламен Димитров құттықтады.
Янка Такева өз сөзінде Қазақстандық салалық білім және ғылым қызметкерлері кәсіподағының ХIV съездіне қатысқанын атап өтіп, съезд кезінде Салалық кәсіподақтың жетістіктері мен еліміздің білім саласына енгізілген инновацияларына таңданыс білдіргенін жасырмады.
Форумға қатысушылар Қазақстандық салалық білім кәсіподағының төрайымы А.Мұқашеваның сөйлеген сөзін қызығушылықпен тыңдады. А.Мұқашева өз сөзінде салалық кәсіподақтың қызметі туралы толығырақ айтып, елдегі білім саласына енгізіліп жатқан инновациялық жаңалықтар мен саладағы әлеуметтік әріптестіктің рөлі, сондай-ақ кәсіподақтың «Педагог мәртебесі туралы» заң жобасын әзірлеп, талқылауға қатысқаны және заңның қабылдануымен күтіліп отырған жаңалықтар турасында әңгіме қозғады.
Форумға Болгарияның бастауыш кәсіподақ ұйымдарының 300-ден астам көшбасшысы мен аудандық, қалалық және облыстық кәсіподақ комитеттерінің төрағалары, елдің білім беру министрінің орынбасары Таня Михайлова, әлеуметтік әріптестері – мектеп директорлары, белгілі ғалымдар, білім басқармаларының басшылары, сонымен қатар әкімшілік-аумақтық бірліктерінің жетекшілері қатысты.
Форум аясында Болгарияның ұстаздар кәсіподағының кеңсесінде Қазақстан мен Болгарияның білім кәсіподағының басшылары кездесіп, ынтымақтастық туралы әңгіме өрбітті.