Жаңалықтар

Женевада өтіп жатқан ХЕҰ Халықаралық еңбек конференциясының 112-ші сессиясы аясында ҚРКФ делегациясы құрамындағы Салалық кәсіподақ өкілдері «Еңбек саласындағы зорлық-зомбылық пен әлімжеттікті жою туралы» №190 конвенцияны талқылау жөніндегі отырысқа қатысты.

Аталған конвенция жұмыскерлердің бәрін, мәртебесі мен еңбек түріне қарамастан, оқушылар мен жұмыс іздеушілерді, жұмыстан шығарылғандарды, еріктілерді де қорғайды. Конвенция гендерлік зорлыққа айрықша назар аударады: барлық жердегідей, еңбек саласында да көп жағдайда әйелдер зорлық пен әлімжеттіктің құрбаны болып жатады.
Конвенция барлық секторларды — жеке және мемлекеттік, ауыл және қала жұмысшыларын, формальды және формальды емес экономикада жұмыс істейтіндерді қамтиды. Ол бүкіл «еңбек әлемін» қамтиды, яғни бұл жұмыс орнынан әлдеқайда кең ұғым. Яғни, №190-конвенция ешкімді «сырт қалдырмайды».
Отырысқа қатысушылар Кәсіподақтар Конвенцияның қағаз жүзінде ғана емес, нақты жұмыс істеуінде де маңызды рөл атқаруы керек екенін атап өтті.

"Астанада ағымдағы жылдың сәуір айында ҚР Кәсіподақтар федерациясының Халықаралық еңбек ұйымымен бірлесіп өткізген «Еңбек саласындағы әйелдер: жаңа шешімдер уақыты» атты Қазақстанның еңбекші әйелдерінің форумында аталған конвенцияны қолдау мақсатында акция өткізілген болатын.

Салалық кәсіподақ №190 конвенция мен оның маңыздылығы туралы ақпараттарды кәсіподақ мүшелеріне жеткізу бағытында жұмысты жалғастырады" -, деп атап өтті Қазақстандық оқу-ағарту, ғылым және жоғары білім қызметкерлері салалық кәсіподағының төрағасы Айгүл Мұқашева.