Жаңалықтар

📣Абай облысының Алакөл демалыс аймағында Қазақстандық оқу-ағарту, ғылым және жоғары білім қызметкерлері салалық кәсіподағының «100 ЖЫЛДЫҚ ЖОЛ: ЖАС ҰСТАЗ - ЖАҢА ДӘУІРДІҢ ТІРЕГІ» тақырыбында жас педагогтарға арналған дәстүрлі республикалық жазғы лагері өз жұмысын бастады.

🔷 Жазғы лагерьдің ашылу салтанатына Салалық кәсіподақ төрағасы А.Мұқашева, Л.Гумилев атындағы Еуразия ұлттық университетінің Заманауи зерттеулер институтының директоры, филология ғылымдарының кандидаты, саясаттану докторы, профессор М.Сыдықназаров, Салалық кәсіподақтың Құқықтық жұмыс бөлімінің басшысы Р. Қыдырбаева, Ә. Сағынов атындағы Қарағанды техникалық университетінің аға оқытушысы, әлеуметтанушы Ж. Түсіпбеков, Л. Гумилев атындағы Еуразия ұлттық университетінің Халықаралық қатынастар факультеті Аймақтану кафедрасының аға оқытушысы, PhD докторы А. Бекебаева және республиканың барлық аймағынан келген 100-ге жуық жас мамандар қатысты.

📖 Республикалық лагерьдің негізгі мақсаты - жас педагогтардың кәсіби және тұлғалық дамуына қолайлы жағдай жасау, олардың кәсіподақ қозғалысына белсенді қатысуын қамтамасыз ету, отансүйгіштік рухын арттыру және ұлттық құндылықтарға негізделген заманауи көшбасшылар тобын қалыптастыру.

✅Шара барысында сөз алған Айгүл Мұқашева: “Салалық кәсіподақ қызметінің басым бағыттарының бірі - жастармен жұмыс болып табылады. Кәсіподақ тарапынан жас кәсіподақ кадрларын даярлау және жас кәсіподақ көшбасшылары қатарынан кадр резервін қалыптастыру мәселелеріне үлкен көңіл бөлінеді. Сіздердің әр сабақтарыңыз, әр сөзіңіз – елдің ертеңіне әсер ететін құндылық. Бұл лагерь – жай демалыс орны ғана емес, идеялармен алмасып, шабыт алатын орта. Бүгінгі жас ұстаз – ертеңгі білім саласының тірегі. Біз сіздерге сенеміз, қолдаймыз және бірге дамуға дайынбыз”, - деп атап өтті. 

✅Сонымен қатар, ашылу салтанатында М. Сыдықназаров жас ұстаздардың қоғамдағы рөлі мен білім саласындағы маңыздылығына ерекше тоқталып, лагерь жұмысына сәттілік тіледі.

✅Салалық кәсіподақ жанындағы Жастар ісі жөніндегі кеңестің төрағасы А.Бітімбай жас мамандарды Кеңес жұмысына белсенді қатысуға, сонымен қатар лагерь барысында белсенділік танытып, шараны жоғары деңгейде өткізуге шақырды. 

❗️Лагерь жұмысы барысында жастар үшін өзекті тақырыптар бойынша түрлі семинарлар, тренингтер, тимбилдингтер өткізіледі. 9 шілдеден бастап тақырыптар бойынша топтық дәрістер басталады.