Аумақтық ұйымдардың жаңалықтары

Ақтөбе облысының Ойыл және Әйтеке би аудандық білім қызметкерлері кәсіподағының қолдауымен «Үздік әлеуметтік педагог- 2023» аудандық байқауы өтті. Байқауға білім беру ұйымдарының әлеуметтік педагог мамандары қатысты.

Байқаудың басты мақсаты - білім беру ұйымдарының шығармашылықпен жұмыс істейтін әлеуметтік педагогтерін анықтау, қолдау және ынталандыру, әлеуметтік педагогтердің кәсіби шеберлігін арттыру, тәжірибе алмасу.

Әділқазылар шешіміне сәйкес, Еңбекту жалпы орта білім беретін мектептің мұғалімі Жазира Тұғырова мен Ж.Жүсібалиев атындағы Ойыл қазақ орта мектебінің мұғалімі Бекзат Ұлықпанов сайыс жеңімпазы атанды. Сонымен қатар Жамбыл жалпы орта білім беретін мектептің мұғалімі Айжан Игілік пен Сапақкөл орта мектебінің мұғалімі Роза Сатығалиевалар екінші орынды еншілесе, Комсомол жалпы орта білім беретін мектептің мұғалімі Қарлығаш Үксікбаева мен С.Дербісалин атындағы Саралжын орта мектебінің мұғалімі Венера Есенжоловалар жүлделі үшінші орынға ие болды.

Байқауда бұдан бөлек аудандық білім бөлімінің басшылары мен аудандық кәсіподақ ұйымының төрағалары байқау жеңімпаздары мен қатысушыларына дипломдар мен алғыс хаттар, бағалы сыйлықтарды табыстады.

Айта кетейік, байқауда үздік танылған Еңбекту жалпы орта білім беретін мектептің мұғалімі Жазира Тұғырова мен Ж.Жүсібалиев атындағы Ойыл қазақ орта мектебінің мұғалімі Бекзат Ұлықпанов 24 қараша күні өтетін облыстық байқауда бақ сынайды.