ЧЕМПИОНАТТА ҮЗДІКТЕР ҚАТАРЫНАН КӨРІНДІ
Оқу-ағарту министрлігіне қарасты «Талап» КЕАҚ ұйымдастырған WorldSkills Kazakhstan – 2023 VIII Республикалық чемпионаты өз мәресіне жетті.
Астана қаласында үш күн бойы өңірлік чемпионаттардың жеңімпаздары 30 құзырет және 7 бағыт бойынша үздік атану үшін бақ сынасты. Салтанатты марапаттау рәсіміне Оқу-ағарту министрі Ғани Бейсембаев арнайы қатысты.
«WorldSkills Kazakhstan – бұл жұмысшы мамандықтарын меңгерген студенттер үшін үлкен мүмкіндіктерге жол ашатын ауқымды чемпионат.
Байқау жеңімпаздарын ҚР Парламенті Мәжілісінің депутаты Ирина Смирнова марапаттады. WorldSkills Kazakhstan-2023 VIII республикалық чемпионатында барлығы 100 медаль: 38 алтын, 26 күміс және 36 қола ұтысқа салынды. 153 қатысушы «Үздік медальонын» жеңіп алды.
Чемпионатта Ақтөбе облысының командасы 30 құзіреттілік бойынша бақ сынады. Чемпионат барысында қатысушылар өз білімдерін жоғары деңгейде көрсетті. Нәтижесінде Ақтөбе облысының командасы 1 алтын, 2 күміс, 3 қола және 8 медальонды жеңіп алды.
Атап айтқанда, Ақтөбе технико-технологиялық колледжінің, Ақтөбе автожол колледжінің, Хромтау тау-кен техникалық жоғары колледжінің, Ақтөбе сервис колледжінің, Ақтөбе өнеркәсіптік технологиялар колледжінің, Ақтөбе Жоғары политехникалық колледжінің, Ақтөбе құрылыс-техникалық колледжінің білім алушылары жүлдемен оралды.
Еске салайық, «WorldSkills Kazakhstan 2023» VIII республикалық чемпионаты 2023 жылдың 23-25 қарашасы аралығында өтті. Оған еліміздің түкпір-түкпірінен 545 студент пен 510 сарапшы қатысты. Сайыс қатысушылары 30 құзырет бойынша өз жұмыстарын таныстырды. Олардың ішінде кірпіш қалау, құрылыс және сылақ, сантехника және жылу жүйесі, графикалық дизайн, дәнекерлеу технологиясы, кондитер, шаштараз ісі, мейрамхана сервисі және т.б. болды.
Жеңімпаздар 2024 жылдың 10-15 қыркүйегі аралығында Францияның Лион қаласында өтетін WorldSkills халықаралық чемпионатына барады.
